Vawiin khan Minister of State for Disaster Management & Rehabilitation etc., Lawngtlai West Assembly Constituency bialtu ni bawk Pu C. Ngunlianchunga chuan Lawngtlai khaw chhehvela sawrkarin hmasawnna hna a thawh hrang hrangte a tlawh kual.

Minister hian chawhma lamah Thingkah Khua a 3rd Indian Reserve Battalion hmunpui sak mek a tlawh a, he hmun hi Thingkah khaw chung hmar lama awm niin North East Consultancy Service ten a design hna leh a sak hna an thawk a ni. Hna hi tan tawh nimahse a panna kawngin duh thu a la sam loh deuh avangin khawllian zawkte lakluh a la har deuh va, a panna kawng hi peih fel a nih hunah chuan chak zawkin hna a thawh theih tur thu thawktuten an lo hrilh a ni. He mi hnu hian 3rd IR nena in ri tura duan Polytechnic hmun sak mek pawh a tlawh nghal a, Polytechnic School sak mek hi tunah hna engemawzat thawh zawh tawh niin Quarters pathum leh Hostel Building chu peih fel deuhthaw tawh an ni a, amaherawh chu Academic Cum Administrative Block tur chu a Design peih fel a la nih chiah loh avangin sak mai theih a la ni lova, Design peih fel a nih veleh a sak nghal theih turin tunah hian Contractor pawhin ban khur a lai lawk vek tawh a ni. Minister chuan April 2013 ah khan heng hnate hi Work Order pek chhuah tawh an ni a, Design Cell lam ten tun thlenga Design an la peih thei chiah lo hi engemaw harsatna an nei a nih a rinawm a, a rang lamin ka lo enpuiin harsatna an neihte chinfel a nih theih nan hma lak ka lo tum ang a ti. He School hi Ministry of Human Resources sum hmanga sak a ni a, Rs 8 Crore senna tura tih a ni.

He mi hnu hian Minister hian Lawngtlai Bypass road tuna laih mek chu a tlawh nghal a. He kawng hi Non Lapsable Central Pool Resource 2013-14 sum hmanga laih niin Rs 12 Crore senna tur Project a ni a, he kawng hian Thingkah khua atanga khawchhak lam pann kalin Lawngtlai piah Nalkawn hmunah a chhuak dawn a, Kilometre 13 a thui tur a ni. A kawng hi Intermediate Range niin Meter 7.45 a zauva laih tur a ni a. Ni 18.2.2014 (Nilaini) khan Lai ADC Chief Executive Member Pu V. Zirsanga’n a laih tanna hun a hawng a, vawiin a Minister in a tlawh hian Metres 200 vela thui an lo lai hman tawh a ni.

Minister chuan Thingkah khua chu chhimlam khuate zingah chuan a vannei ber pawl an nia a hriat thu sawiin tunah hian DIET hmun, Polytechnic hmun, 3rd IR Battalion hmun leh Bypass Road te thawh mek an ni a, heng hmunhmate sawrkar hnenah a thlawna an pek phal avangin Thingkah khawtlang hian fak an phu a, heng hmasawnna lo awm tharte avang hian nasa takin khawtlangin a la chhawr zel dawn bawk a ni a ti.

Chawhnu lamah Minister hian Greater Lawngtlai Water Supply Scheme hnathawh mekna, a khawlpui bunna hmun Chengpawngzawl leh tui dahkhawlna tur Chawnhu tlanga sak chu a tlawh leh a, hnathawktute chu hun tiam chhunga zo hman ngei tur leh kumin thal ah pawh chhawr hman hial a beisei thu a hrilh a, amaherawh chu hna tha leh rintlak mipuiten an beisei avangin inthlahdah hauhlo turin a chah bawk.

Minister hi Aizawl atangin Disaster Management & Rehabilitation Department Deputy Secretary Pu Rohnuna leh Dr. B. Zonghinga, Senoir Vety Officer ten an rawn tawiawm a, Lawngtlai chhehvel a tlawh kualna ah hian Lawngtlai Bawrhsap Pu J. Hmingthanmawia, Lawngtlai SP Pu Lalringdika leh Officer thahnem takin an tawiawm a ni.