Mizoram Police Sports & Cultural Control Board buatsaih Mizoram Police Sports Meet vawi 16-na, ni 23-27 February, 2015 chhunga neih tur chu vawiin chawhma dar 10:00 khan Rajiv Gandhi Stadium, Mualpui ah Sport & Youth Services Minister Pu Zodintluanga’n a hawng.
Minister chuan Sports Meet hawnna thu sawiin inunauna tha siam nana Police ten Sports Meet an hmang thin chu lawmawm a tih thu a tarlang a. Mizoram mipui te thlamuang taka an awm theih nana dan leh thupek tha taka an kenkawh thin avangin lawmthu a hrilh a, an thawhrimna zara remna leh muanna tha taka vawn a nih avangin Sawrkar pawhin hmasawnna hna tha takin a thawh theih phah a ni, a ti. Dan leh thupek kengkawha mipui tana boruak muanawm siam tura Mizoram pawna Assam leh Chhattisgarh ah te Mizo Police ten tha taka an thawhna te chu Minister chuan chhuanawm a ti a. An inpekna avangin Mizo thalai ten infiamna lama hma an sawn theih nan Rajiv Gandhi Sports Stadium tha tak sak a ni a, infiamna hmunhma changtlun chhoh zel azarah ram pum huap pawhin Mizoram state te tak te chuan champion nihna a hauh thei ta a ni, a ti.
Mizoram DGP Pu Dharmendra Kumar, IPS pawhin thu tawi sawiin Mizoram Police Sports Meet chu kum 1987 atanga hman a nih dan te leh inthlanna avanga kum hnih kalta chhunga an lo hman theih loh dan te a sawifiah a. Police hna tha taka thawk tur chuan taksa hriselna tha a pawimawh avangin infiamna neih thin pawh a tangkai hle a ni a ti. Police awmna hmuna Sawrkarin Sports Stadium changtlung tak a siam chu lawmawm tiin infiamna lama state leh ram pum huapa Police te hlawhtlinna te chhuanawm a tih thu a tarlang bawk.
Mizoram Police Sports Meet vawi 16-na ah hian sports discipline hrang hrang ah inelna nei turin infiammi 1228, battalion hrang hrang leh Mizoram hmun hrang hrang atangin an lo kal khawm a ni.
