AH & Vety Minister Pu C.Ngunlianchunga chuan nimin khan AH & Vety Farm, Mampuia vawk note tam zawk thar chhuah theihna tura hma lakna a en.

Pu C.Ngunlianchunga chuan Mizoram chu vawk notea a intodelh theih nan hma lakna kalpui mek a nih thu sawiin, tuna Mampuia Pig Breeding Farm chu vawk note tam zawk thar chhuah a nih theih nan thuam that chhoh mek a ni, a ti a; tihpuitlin a nih hun chuan Mizoram chhim lam District-te chuan hmun dang atangin vawk note an lak luh a ngai dawn lo a ni, a ti.

Mampuia Pig Breeding Farm tilian tura hma lakna hi National Livestock Mission (NLM) hnuaia thawh a ni a. Tun dinhmunah Civil Works bikah cheng vaibelchhe 13.42 hmang tawhin, vawk in awm sa pathum zauhvin pindan pakua leh vawk no neihna pariat sak a ni tawh a, hna hi la thawh mek a ni. Vawk tlatna tur 4200 Sqm-a zau siamsak niin, tun dinhmunah vawkpui tur 50 enkawl mek a ni bawk.