Tukin khan Minister of State for AH & Vety Pu C. Ngunlianchunga chuan kumin February ni 18 atanga 21 thlenga Mizoram Thalai Kristian Pawl (MTKP) Khawmpui Lian nghahna tur, Lawngtlaia Central YLA Ground a tlawh.

Thusawiin Pu C. Ngunlianchunga chuan, khawmpui pawimawh tak thleng tur kan nih avangin kan theih anga tha a inbuatsaih a tula, Pandal sakna tur Ground pawh a tha taka chei ngei kan tum dawn a ni. Tin, a chhehvela inthiarna turte, mipui kal velna turte, a panna kawng te, tui thianghlim hnianghnara a awm theihna turte, Power Supply mumal taka lak theihna tur leh thil tul apiangte ngaihtuah a tul ang. Chung thil pawimawh awm te sutkian kawngah a tul ang zela hmalak pui tur che u in ka inring reng a ni, tiin amah lo dawngsawngtu MTKP Khawmpui Organising Committee hotute chu a hrilh a ni.

Minister hi Lawngtlai Bawrhsap Pu J. Hmingthanmawia’n a tawiawma, Bawrhsap pawh hian a tul ang zela Organising Committee tanpui a inhuam thu a sawi a ni. He hunah hian Ground chei kawnga hmala thei tur Department aiawhten an hnathawh theih leh an thawh mek tawhte an sawi hlawm a, hmalak belh tul tur ang chite pawh sawichhuah nghal a ni bawk.

Khawmpui Pandal hi a dung feet 200 avang feet 150 a liana sak tura ruahman a ni a, a sa tur hian Silchar lama mi Chakkeswari Bhandar Pvt Ltd chu chah an ni a, February ni 6 hian sak zawh hman an tum a ni. Tunah hian khawmpui palai kal tura in report hi pastor bial 77 atangin 8000 zet an ni tawh a, an ni bakah hian State pawn atangin Palai engemawzat beisei an ni.

Attachment

  • Loading attachment...