Tukin zingkar khan Minister of State for AH & Vety leh Lawngtlai West Assembly Constituency bialtu ni bawk Pu C. Ngunlianchunga chuan a bial chhung Ngengpui khuaa Horticulture Department tanpuina thlasik thlai chingtute a tlawh a, an thawhrimnaah lawmthu hrilhin hmaa an sawn zel theihna atana an mamawhte a en sak bawk.

Minister chuan Ngengpui lui kama thlasik thlai ching thintu, Ngengpui khua leh a thenawm khuate thawhrimna avangin Lawngtlai District chuan thal chawhmeh tam tak a thar thina, a chang phei chuan District danga thawnchhuah ngai khawpin an thar thin. Hei vang hian State dang thawhchhuah sa kan chawkluh thin te chu thla engemaw chen a lo chhawka, a lawmawm hle a ni. Ram hmasawnna atana kawng hnai ber chu kan mamawh, keimahni ngeiin kan tharchhuah hi a nih avangin vawiina loneitute thawhrimna hi fak tlak a ni a ti. Thlai huan siamtute hian an duhthusama tui an hmuh thatloh thu leh leilehna hmanrawn tha an mamawh thu an lo hrilh a, Minister hian a theih anga lo enzui sak a tiam a, Power tiller pawh sawrkar in Subsidy programme a neih lai a nih avangin ngaihven rang se a duh thu a hrilh bawk.

Lawngtlai Divisional Horticulture Officer Pu L. Lalhmingmawia Pachuau in report a pek danin Horticulture Mission for North East and Himalayan Region (HMNEH) leh Mission for Integrated Development of Horticulture (MIDH) hnuaih heng Loneitute hi tanpuina kawng hrang hranga an siam sak thu a sawi a, kumtina ngengpui lui kama thlai chingtute chu Area expansion Scheme thlai chi an pe thina, tui dakhawlna tur leh tui pipe te an pe thin bawk. Hei bakah hian a tul angzelin thurawn an pe reng thin a ni.

Kum 2013-14 thlasik lai khan Ngengpui khua bik hian thlai thar atangin Cheng Nuai 15 vel an la lut a, chhungkaw khatin nuai 1 atanga nuai 1.5 inkar an la lut ber thin. Kuminah hian chhungkaw 30 velin thlasik thlai hi chingin an zinga chhungkaw 15 vel hian lian tham deuhvin an ching a, tun ang renga an thlaite an hralh theih chuan Cheng nuai 2 vel lakluh theih in beisei chhungkaw sawm vel an awm a ni.

Horticulture Department hnuaiah hian kawng hrang hrangin hnathawh reng a ni a, tun hnaiah pawh Thlai chawmna tur tui dahkhawlna Litres 50000 dawng hmun 6 ah siam niin mimal huana tui dahkhawlna tur Tuipuan Chhah chi mi 100 hnenah sem a ni bawk. Tun hnai vek khan Thei chi chi hrang hrang chhungkaw 290 hnenah pek an ni bawk. Heng bakah hian IWMP leh Area Expansion Scheme hnuaiah chhungkaw engemawzat tanpuina hna thawh sak an ni tawh bawk.