Vawiin khan Lawngtlai West Assembly Constituency bialtu MLA Pu. C. Ngunlianchunga, Minister of State for Disaster Management & Rehabilitation ni bawk chuan a bial chhunga khaw hrang hrangte Fottball a inelna Lawngtlai West A/C Football Tournament Final Match Lawngtlai Central YLA Playground a khelh chu khuallian niin a hmanpui.

Final Match hawnna inkhawm tawiah thusawiin khuallian chuan Mizoramah Infiamna hmunhma tha zawkte kan lo neih tak zel avangin kan thalaiten ram pum huapa inelna lian tak takah hnehna an chang chho ta mawlh mawlh mai a, tun hnai maia National Games neih zawh takah pawh Mizoram chu Football bikah a Champion a ni. Kan thalai engemawzat ten Football hi eizawnnana hmangin kum khatah Cheng nuai 10 aia tam an lo la lut thei ta a, hetiang dinhmun an thlen theihna bul pakhat chu infiamna hmunhma tha kan lo neih tak vang a ni a ti. Chutih rualin Thingtlang kilkhawr tak tak atangin kan infiammi langsar engemawzat te hi an rawn zi chhuak hlawm a, chu chuan mi tumruh, inthunun thei mite tan hlawhtlinna kawng a inhawn zau zia min hmuh tir bawk. Vawiina hetianga Assembly bial huapa infiamna kan buatsaih thin chhan pawh hi hmun kilkhawr zawka cheng, talent nei tha leh mi tumruh haichhuah tur an awm kan beisei vang leh an tana hmakhaw sial kan tum vang a ni a ti bawk.

Infiammi kal khawmte chu zuk leh hmuam, zu leh ruihtheithil laka inthiar fihlima, chhungrila tumruhna thuk tak nei chunga bei tura fuihin, infiammi niawm renga mawia an nungchang vawng turin a fuih bawk.

He Tournament hi Lawngtlai West MLA bial chhunga khaw 68 atangin khaw tam zawk ten an khela, Elimination Round hi khaw paliah khelin chuta tanga a ti tha khaw 12 ten Final Round hi an khel a, an zinga a thiam pahnih Chawngte P Football Club leh Thingkah Football Club ten Final Match khelin Thingkah FC hi 4-3 in an chak a ni.