Nimin khan BADP-NEDP convergence hmanga Lawngtlai District Bungtlang S Block-a Saikhawthlir khaw pawhtu motor tlan theihna kawng laih thar chu AH & Vety Minister Pu C. Ngunlianchunga'n a hawng.
Hemi puala Saikhawthlir khelmuala inkhawm buatsaihah Pu C. Ngunlianchunga chuan Saikhawthlir khua, motor la tlan luh ngai lohna khuaah motor a luh ve theih nana BADP-NEDP convergence hmanga jeepable road laih thar a ni ta chu thil lawmawm tak a nih thu a sawi a. Lirtheiin a pawh phak loh khua ai chuan lirthei luh theihna khuaah hmasawnna a kal chak zawk a, eng kim a awlsam zawk tih sawiin, Saikhawthlir khua paw'n chak zawka hma an sawn zel a beisei thu a sawi a. Thingtlang kawng laih chu laih tlang phawt a pawimawh hmasa tiin, chumi hnuah a tha lo laite siam thain kawng tha leh tlo zawk a awm theih nan hma lak chhunzawm zel theih a ni, a ti.
Kawng hawn lawmna inkhawm hi bialtu MDC Pu JC Ngurluaia'n kaihruaiin, Lawngtlai East bialtu MLA Pu H. Zothangliana leh LADC CEM Pu T. Zakunga te pawhin thu an sawi a. AH & Vety Department hnuaia NLUP 3rd & 4th Phase vawk vulh thlangtu chhungkaw 5 hnenah tanpuina final instalment chu Minister hian a hlan nghal bawk.
Saikhawthlir khua hi Bungtlang S thlanga awm niin, in 43 an awm a. Kawng laih thar hi Bungtlang S atanga M. Kawnpui panna kawngpui atangin a peng a. A thui zawng hi km 4.600 niin, BADP atangin Rs nuai 5 leh NEDP LAD atangin Rs nuai 10 hmanga laih a ni.
