Nimin chawhnu khan Save Chite Lui Executive Committee chu an Chairman Pu Lalmalsawma, IAS, Chief Secretary hovin Chief Secretary Conference Hall-ah an thukhawm.

He hunah hian Chite Lui Action Plan Phase–I hnuaia hmalak tawhna leh hmachhawp la awmte thlirho a ni a. Action Plan Phase-I hi Chite Lui pawimawhna bakah chhanchhuah leh humhalh a tulna mipuite hnena hriat thar tirna (public awareness component) niin, Phase-I a tihtur hmachhawp la awm te bawhzui dan tur pawh sawiho a ni.

Chite Lui Comprehensive Plan of Action Phase-II chu duan zui nghal nise an ti a. Phase-II ah hian Chite Lui chhanchhuak tur leh humhalh tura zau zawka hmalak dan turte, lui humhalhna tura a luidunga hna thawh dan tur hrang hrangte, sawrkar department hrang hrangte nena thawhho dan turte leh sawrkar laipui atanga fund zawn dan turte bakah Chite Lui Detailed Survey neih dan turte pawh khung tel a ni dawn a. Phase-II hi bawhzui nghal tura ruahman a ni.

Mizoram Governor-in Mizo mipuite hnenah nikum 2017 Krismas thilpekah Chite Lui fai leh thianghlim zawk pe hman ngei tura a ngenna pawh tihhlawhtlin a nih thu sawilan a ni bawk.