Vawiin khan Pu PC Lalthanliana, Social Welfare Minister chuan MUP Aizawl West III Conference vawi 9-na chu Khatla South YMA Hall ah a hmanpui.

Pu PC Lalthanliana chuan Mizoram innghahna lungphum pawimawh tak tak pathum chu sawrkar, kohhran leh tlawmngai pawlte an ni a, heng thil pathumte hi kan ram leh hnam kal zel nan an pawimawh a, MUP chu tlawmngai pawl lian leh pawimawh ber zingah an tel, a ti. Upa pawlte hi vanglai leh thatlai huna veng leh khawtlang tana mi tangkai, Zoram puma mi pakhat tling pha tam tak awm khawmna an ni tiin ram leh hnam zahawmna an kovah thui tak a innghat, a ti a. Thangtharte tan engnge an hnutchhiah dawn tih ngaihtuah tur leh zirtir an ngaihna laiah zirtira, kaihhruai turin a fuih a ni. Social Welfare Minister Pu PC Lalthanliana chuan Mizo mipuite hian a tha lai insawisak aiin a chhe lai sawisel kan uar a, ramin hma a sawn theih nan moral reformation kan mamawh hle niin a sawi a. An tu leh fa, thalai rualte leh Mizo mipui nawlpuiin ngaihsan tur dik an ngaihsan a, chawimawi tur dik an chawimawi theih nan kawng dik kawhhmuh theitu chu upate an ni, a ti bawk. 

MUP Aizawl West III ah hian Unit 7 an awm a, Area kaihhruaitu Office Bearer 6, Adviser 3 leh Unit aiawh 25 bakah Ex-Officio 3 an nei. An area chhung ami Pi Vanlalmuani, Bungkawn Unit chuan ram pum huapa chawimawina sang, All India Level Senior Citizen Award Female Urban Area (2016-2017) a dawng a. Ani hi Mizoram Senior Citizen atanga hetiang chawimawina dawng thei hmasa ber a ni. 

Aizawl West III Area MUP Conference hi session hniha then niin chawhma hi MUP General Hqtrs. Vice President ni lai leh West III Area Senior Adviser ni bawk Pu Lalhuapzauva’n a kaihruai a, an member boral ta mi 52 sunna hun an hmang bawk. Chawhnuah rorel leh intihhlimna hun an hmang chhunzawm a ni.