Vawiin chawhma khan Bazar Veng Lunglei khawtlang mipuite hmalakna a din Bazar Veng Higher Secondary School hawnna programme neih a ni a, Social Welfare Minister Pu PC Lalthanliana leh Lunglei West bialtu MLA Pu Chalrosanga Ralte ten an hmanpui.

He hun Pu Lalrammuana Chawngthu, Vice Chairman Managing Board kaihhruaiah hian Social Welfare Minister leh Managing Board Member ni bawk Pu PC Lalthanliana chuan thu sawiin zirna chu hmasawnna tin reng innghahna a ni a, zirna tha a awm theih nan sorkarin theihtawpin hma a la zel a ni, a ti. Bazar Veng Higher Secondary School hawn thar chu Lunglei khawpui bakah thingtlang mipui leh zirlaiten tangkai taka an chhawr a beisei thu sawiin Social Welfare Minister chuan school hawn chu bul tanna chauh a ni , a ti a. Zirna in tha leh changtlung tak nei tur chuan hmabak tam tak a la awm a, hemi kawngah hian khawtlang mipuite, zirtirtute leh zirlaiten nasa taka tan an lak chhoh zel a tul a ni, a ti bawk.

He huna khuallian Lunglei West bialtu MLA Pu Chalrosanga Ralte chuan Bazar Veng khawtlang mipuiten zirlaite hmakhua ngaia thahnemngai taka zirna kawnga hma an la chu an fakawm takzet a, hmasawnna rahbi pawimawh tak a ni, a ti a. Zirna ti hmasawn zel tura sawrkar hmalakna hrang hrang sawi langin Pu Chalrosanga Ralte chuan heng sawrkar scheme ti hlawhtling turin mipuite thawhho puiah a sawm a. Zirlaite hnenah fuihna thu sawiin MLA chuan rilru nei tak leh an hma hun thlir ran chunga thiamna tak tak nei thei tura taima turin a chah a. Central sawrkar hnuaia competitive exam hrang hrang UPSC, SSC ah te Mizo inziak tling an tlem thin chu pawi a tih thu sawiin zirlai kalkhawmte chu heng competitive exam bei ve tura inpuahchah turin a fuih bawk. MLA hian Bazar Veng Higher Secondary School hnenah Computer, UPS leh printer a hlan nghal bawk a ni.

Bazar Veng Higher Secondary School-hi kumin Academic Session atangin class neih tan niin an Classroom hi Government Bazar High School Ground Floor ah neih a ni a. Tun dinhmunah subject panga – Mizo, English, Political Science, Geography leh Education an nei tawh a, Lecturer panga an ruai tawh bawk a ni.