Nimin khan RMSA hnuaia Rs. 55.5 lakh senga sak Sesawng Secondary School (High School) Building chu Pu Chawngtinthanga, Parliamentary Secretary, School Education in a hawng.
Pu Chawngtinthanga chuan thu sawiin Sesawng khua leh a chhehvel in an mamawh em em High School Building tha tak mai Sawrkarin a sa zo ta leh hman theih a hawn a ni ta chu lawmawm a tih thu a sawi a, hemi sak a nih theihna tura Mizoram Sorkar hmalaknaah lawmthu sawiin a puitlin theihna atana tha leh zung, ngaihtuahna sengtu RMSA hotute chungah lawmthu a sawiin Sesawng khua leh a chhevel ten an chhawr tangkai ngei a beisei thu a sawi a.
Parliamentary Secretary chuan Zirtirtu thawk lai mekte leh lak tharte fuihna thu sawiin Zirtirtu a lak an nih avanga Zirtirtu a tling ta renga inngai lo tur leh rawngbawlna thianghlim, kan mihring puite tana rawngbawlna atana ticket nei ve tanah inngai a, Zirtirtu hna chu rawngbawlna thianghlim Vanram hawlh thleng a nih avanga Zirtirtu chuan a nun uluk a tul thu te, Pastor te pawhin rawngbawlna thianghlim chelhtu an nih avanga an nun an uluk ang chiah a nun vawng thianghlim turin a chah a.Zirtirtute chu tunlai khawvel hriatna than ang zela hriatna lama thang zel turin a fuih bawk.
He inkhawma khual zahawm Pi Esther Lalruatkimi, Secretary leh Director, School Education Department chuan thu sawiin Zirna hi Zoram din chhuahna atana pawimawh ber a nih avangin Nu leh Pa ten fate zirna kawnga theihtawpa tan la tura harh a hun zia leh In sak nan leh Lirthei leina atan Bank loan kan lak ngam laiin kan fate zirna atan Education Loan la kan la awm mang lo te hian kan fate zirna kan la ngaih pawimawh tawk loh zia a tarlang a ni a ti a, Zirtirtu tan Zuruih a thiang lova, kuhva ei sen huam chunga class lak te, Zirtirtu hmeichhia te tan Class Room ah Jeans hak a thiang lova, kekawr an ha duh a nih chuan zahawm takin an ha tur a ni a ti.Pi Estheri chuan Zirlai kalkhawmte chu fuihin Pathian tih chunga taima taka lehkha zir tur te, zirlaite chuan thil dang ngaihtuah lova an zirlai chauh ngaihtuah tur an ni a, miten thing min ti mah sela thing min titu te aia dinhmun sangah kan la ding dawn a ni tiin a fuih bawk.
School Building thar hawnna inkhawm hi Pu S.Lalthanghuta, Addl.SPD,RMSA in a kaihruai a, State Project Office Engineer ten Technical Report pein Sesawng khawtlang hruaitute atangin lawmthu sawina ngaihthlak a ni bawk.
