Lok Sabha MP Pu C.L.Ruala’n SAGY Programme hnuaia Model Village atana siam tura a thlan Khawlailung khua tihhmasawnna tur (Village Development Plan) chu amah Pu CL Ruala hovin hovin SAGY Line department hrang hrangte leh Khawlailung Village Council aiawh ten vawiin nileng khan DRDA Conference Hall, Serchhipah an sawihova; siamthat ngai te siamthat anih bakah belh ngaih leh paih ngaite thlitfim anih hnuin lungrual taka pawm a ni a, Village Development Plan Document hi Pu C.L.Ruala, MP, Lok Sabha, Pi Juhi Mukherjee, IAS, Nodal Officer, Pi Teresy Vanlalhruaii, Charge Officer leh Pu K.Thangbawia, VCP, Khawlailung ten hming an ziah hnan a ni.

Khawlailung Model Village atana siamna tura ruahmanna (Village Development Plan) hi Line Department hrang hrang 20 te’n Khawlailung khaw mipuite nena inrawn tlanga an siam a ni a, Line Department te hian Plan hrang hrang an siamte chu priority nambar 1, 2, leh 3 ah an thliar hrang leh a,  SAGY inkaihhruainabu ah thla 12 chhunga thawh zawh vek tura tih anih vangin Department hrang hrang Plan/Project siamte uluk taka thlirin huntiam chhunga tihhlawhtlin theih tur chi anih leh nihloh uluk taka sawiho hnu ah thutlukna an siam a ni.

Pu CL Ruala chuan SAGY Line Department official te thawhrimna leh thahnemngaihna ah lawmthu sawiin Khawlailung chu khaw entawntlak (model village) a siam anih ngei theih nan theihtawp chhuah turin a sawm a, Sawrkar Laipuiin Model Village siamna tur hian sum a hranpa a a dah loh avangin development work sum tam tak senga thawh mup mup tura ngaihna hi a dik lova, mipuite rilru a hmasawnna duh tak takna thinlung tuh a pawimawh a, khawtlang inlungrualnate, thawhhona tha bakah mimal tin nunphung leh rilru sukthlek  a hmasawnna a awm a pawimawh ber a ni a ti a, SAGY hnuaia hmalaknate hi thla 12 chhunga thawh zawh vek tur anih hlawm avangin Project lian tak tak siam a rem lova, Department hrang hrangte nen zaikhata luanga hmachhawpte tihlawhtling turin khawtlang hruaitute a chah a, khawchhung mamawh zualpui lo thawh hmasakna turin Rs nuaih 10 MP Fund atang a sanction nghal bawk a ni.

Model Village Development Plan hi May thla ral hma a Sawrkar laipuia thehluh tur a ni a, annin an lo endik hnu ah pawm tur chin an lo thliar fel ang a, July thla atangin hma lak tan nghal tur a ni ang. SAGY hi October ni 11, 2014 khan Prime Minister Narendra Modi-a’n a hawng a, he scheme bultan nan Lok Sabha leh Rajya Sabha MP te chu an Constituency chhunga khaw pakhat ve ve (an pianna khua leh an nupuite pianna khua thlan phal ani lo thung) thlang tura tih an nih angin Lok Sabha MP Pu CL Ruala MP hian Serchhip District-a Khawlailung khua a thlang a, Rajya Sabha MP Pu Ronald Sapa pawhin Serchhip District ami tho Chhiahtlang khua a thlang bawk a; Chhiahtlang Village Development Plan hi kar kalta ningani (May ni 21, 2015) khan Model Village atana thlangtu Rajya Sabha MP Pu Ronald Sapa Tlau hova pawm alo ni tawh bawk  ani.

Vawiin Khawlailung Village Development Plan sawihona hun hi Serchhip bawrhsap Pi Juhi Mukherjee, IAS, SAGY Nodal Officer ni bawkin a kaihruai a, Pi Teresy Vanlalhruaii, MCS, Charge Officer, Khawlailung Model Village in powerpoint presentation pe in Khawlailung VCP Pu Thangbawia’n thusawina hun a hmang bawk a ni.