Naupang huaisen chawimawina Jeevan Raksha Padak India Sawrkarin a pek te Malsawmtluangi (L) leh Hani Ngurdinthari, Mamit District Lengte khua a mite hnena hlanna hun vawiin khan DC Conference Hall-ah hman a ni.

Award hlanna puala inkhawm hi Pi Lalbiaksangi, Addl DC, Mamit in a kaihruaia, chawimawina thuziak District Bawrhsap Pu Vanlalngaihsaka’n Malsawmtluangi nu leh pate leh Hani Ngurdinthari te hnenah hlanna neiin, Medal hi SP Mamit Pu Lalnunmawian a hlan a, Pi Lalbiaksangi, Addl DC in Cheque hlanna a nei bawk.

June ni 8 2013 khan Malsawmtluangi leh a nau, Vanrosanga leh thian dangte pali Lengte khaw lui Dialdawk ah an kal a, hlim taka hun an hman hnu in an haw lam chu Lui daikai an ngaih avangin inkai chungin lui lian chu daikai an tum a. Vanrosanga chu tui lian tak mai leh khauh tak mai chuan a ke phetin, tui chuan a la ta a, a thlang li ah a len lut a ni, Malsawmtluangi chuan tui hleuh pawh thiam lovin a nau Vanrosanga chhan nan chuan tuiah chuan a zuang lut a, Tuilian chu a nasat em avangin a nau chhan tuma zuang thla Malsawmtluangi chu tui lian chuan la-in a nunna a lo chan phah ta a ni. An thian te zinga mi Hani Ngurdinthari chuan a thiante chhan tumin li-ah chuan a zuang lut ve ta a, tui a nu in a khauh hle a, Hani chuan a khawih fuh hmasak ber Vanrosanga chu la chhuakin nikhua hre tawh lo chu a thiam dan dan in tuitla sawngbawl dana sawngbawlin reife hnu chuan a lo harh chhuak leh ta a ni.

Malsawmtluangi’n tui pawh hleuh thiam lo chunga a nau nunna chhan tuma nunna chan huama a beihna leh Hani Ngurdinthari’n a thiante chhan tuma theihtawpa bei a Vanrosanga nunna a chhan chhuah sak a vangin India Sawrkar chuan an thiltih ropui hi hriatsakin Naupang huaisen chawimawina Bravery Award chu Prime Minister of India pawn kum 2014 khan a lo hlan tawh a ni

Award hian Chawimawina thuziak, Medal leh Rs 40,000/-( singli) a keng tel a ni.