Government Aizawl West College leh OKD Institute of Social Change and Development tangkawp te chuan National Level Workshop on Social Science Research May 26, 2015 a an buatsaih tan chu vawiin khan Tourist Lodge, Chaltlang ah khar a ni a. He hun hi Planning Secretary Dr. C.Vanlalramsanga’n khuallian niin a hmanpui.

Dr. C.Vanlalramsanga chuan National Level Workshop on “Social Science Research” Mizoram a neih ani chu lawmawm a tih thu a sawi a. Rinthu leh suangtuahna fing hmanga policy siam aiin tanchhan tur hmanrua leh a zat tur dik tak  chhutchhuah theih behchhanna a policy siam a fuh tawh zawk a ni a ti. Khawvel thang mekah empirical evidence based policy kalpui a pawimawh telh telh avangin Social Science Research a pawimawh tulh tulh a ni tiin  a tak hmuh leh chhiar theih tanchhana Research kalpui chu policy tha, sawrkar tha leh khawtlang tha neih theihna tura hmanraw pawimawh tak a ni a ti a. A sawi zel na ah International level leh National level a evidence based policy a pawimawh ang chiahin sub-national level-ah pawh a pawimawh thu a sawi a. Social Science Research leh Policy inlaichinna leh inkungkaihna chhawrnahawm tak nei tur chuan Zirtirna a mithiamte, ramhruaitute leh mipui tanrualna leh thawhhona mumal tak neih a tul tiin chumi atan chuan Workshop chhimtu zawng zawngte chu an mawhphurhna theuhvah thahnem ngaitak leh hriatbelh zel tuma thawk zel turin a chah a ni.

Workshop kharna hun hi Dr. B.Lalrinsanga, Aizawl West College in a kaihruai a. Resource Persons Prof. Bhupen Sarmah, Director, OKDISCD leh Dr. Joydeep Baruah ten workshop neih chhunga thupui khaikhawmna sawiin Dr. R.Lalsangpuii, Government Aizawl West College in report kimchang a pe a ni.