Vawiin khan Mamit District Level Vigilance and Monitoring Committee chu Chairman Pu C.L. Ruala Lok Sabha (MP) hovin DRDA Conference Hall, Mamit-ah neih a ni.

Chairman Pu C.L. Ruala chuan he Committee hi Ministry of Rural Development hnuaia sum hmanna hrang hrangte endiktu a ni a, tun hnai-ah Central lam atanga pawisa dawn a tam loh avangin kan dawn chhun ang angte tangkai lehzuala hman a ngai a, kan hnathawh leh kan sum hman a inphu tur a ni a, mipui vantlang tana rawngbawl kan nih avangin Officers kalkhawmte chu taima taka hnathawk turin a fuih a ni.

Ministry of Rural Development hnuaia Scheme hrang hrang MGNREGS, IAY, PMGSY, NRDWP, TSC, NSAP, RGGVY leh Ministry of Land Resources hnuaia scheme IWMP te thlirho a ni a. Project Director, DRDA chuan chhungkaw 20157 tan Ni 20 inhlawhna pek a nih mek thu leh Convergence atan Sericulture, Rubber Plantation leh Pisiculture hmanga hmalak a nih thu sawiin, IAY hnuaiah chhungkaw 49 te In sak sak anih tawh thu a sawi bawk a ni. Department Officer hrang hrang ten an hnathawh te leh an sum hman dan te an sawi a. Committee chuan PMGSY hnuaia Mamit - Phaizau kawng thawh mek chu hmalak chak lehzual a nih theih nan hotu lian te hnenah thlen nise a ti a. Convergence kalpui turah beneficiary te chu uluk lehzual a thlan anih theih nan State Government ah rawtna thlen nise a ti bawk a ni. MGNREGS hnuaia mipui inhlawhna te leh Material Component te chu uluk lehzualin BDO ten lo enpui se, mipui tana thil tangkai leh rotling siam ngei nise Committee chuan a ti a. Chairman Pu C.L. Ruala M.P. (LS) chuan Officer kalkhawmte chu mipui rawngbawltu an nih hre reng turin a chah bawk a ni.

Meeting hi Committee Chairman Pu C.L. Ruala MP (Lok Sabha) in a kaihruai a. Food & Civil Supply Minister, Pu John Rotluangliana, Pu K. Lalthawmmawia, DC Mamit bakah Mamit District Officer hrang hrang te an tel a ni.