659/2023-2024

Aizawl, 2nd June, 2023 : Pu C.Lalrinsanga Minister, Agriculture, Irrigation & Water Resource etc chuan vawiin khan a pisa-ah HSLC Exama 8-na dinhmun luahtu Lunglei khaw zirlai Vanlalhmangaihi chawimawina leh lawmpuina hun a hmanpui a. Lawmpuina thilpek cheng nuai 1 leh Citation a hlan a ni.

Pu Rinsanga chuan ama bial chhung chauh ni lovin, Lunglei tan Pa chan a chan a ngai tih sawiin nikum lamah Lunglei District atanga Matric Top Ten-a lang thei zirlai an awm chuan cheng nuai 1 pek a lo intiam tawh angin Vanlalhmangihi, Lunglei Chanmari Veng hian a intiamna chu a rawn su thlu ta a ni, a ti a. Vanlalhmangihi hlawhtlinna lawmpuina leh chawimawina chu Lunglei District zirlai tam zawk tan chona ni se, zirlai ten entawn tur dik an hriat thar nan hmang se a duh tih tarlangin Vanlalhmangihi chu zirlai dangte tana entawn tlak leh chhenfakawm tak ni chhunzawm zel turin duhsakna a hlan a ni.

Vanlalhmangihi lawmpuina leh chawimawina hun hi Lunglei East bialtu MLA Pu Lawmawma Tochhawng, Vice Chairman Lunglei High Powered Committee bakah School Education hotute, zirlai pawl MZP, MSU hruaitute leh mi pawimawh dang ten an telpui a ni.