DIRECTORATE OF INFORMATION & PUBLIC RELATIONS, Government of Mizoram, India

660/2023-2024

Mamit 2nd June, 2023 : Pu K. Lalrinliana, Hon'ble Minister, Food, Civil Supplies & Consumer Affairs, Local Administration Department leh Fisheries Department chuan vawiin khan Mamit-a FCS&CA Office building thar chu khuallian niin a hawng.

Khuallian chuan thu sawiin NABARD hnuaia Administrative buliding sakna tur sum hmuh theih a ni lo nachungin Supply Godown satu Contractor te'n an Godown sakna atanga hlawkna an hmuh pawhkhawm atanga Mamit DCSO Office building thar puitlin theih a ni chu thil lawmawm tak a nih thu sawiin he hna puitlin theihna tura thathawhtu leh khawtlang mipui tawiawmna zawng zawngah lawmthu a sawi. Mizo hnamte chu inrun a, lu inlaksak a, inthat thin hnam kan ni thin a. Chuvang chuan Pathianin Mizote chu hmun hran hrana min dah anih thu sawiin chutihrual chuan Pathianin min humhim a, min hruaikhawm mek a ni a ti. Mizo hnam inunauna chu a chakin a tha telh telh a, kan ram a rethei hle nachungin Pathian khawngaihna azarah eirawngbawlna Gas leh buhfai pekchhuahna lamah harsatna kan nei lo chu a lawmawm em em a ni a ti bawk.

Supply Minister chuan kan thenawm State te'n kawngpui leh Rel kawng Block thin mahse Pathian remruatnain kan kal zel ang a, kan ram, kan hnam hi huaisen takin Pathian thlazarna hnuaiah hmalam panin kan kal zel dawn a ni a ti. Taima leh inlungrual takin, kan unau raltlante nen kan awm ho chuan hnam ropui takah kan awm thei tih hria a, inngeih tlang taka chenho a pawimawh thu a sawi bawk.

He hun khualzahawm ni-a hmanpuitu Er. H. Lalzirliana, Mamit bialtu MLA, Vice Chairman, Road & Infrastructure Development Board chuan FCS&CA hnuaia DCSO Office building sak zawh a, hawn a ni ta chu lawmawm a tih thu sawiin Supply Minister hmalakna bakah FCS&CA a thawktu zawng zawngte tanrualna leh inpekna chu ropui a tih thu a sawi a. Ram pumin hripui leh raltlan avanga harsatna kan tawk chungin ei leh bar, buhfai leh eirawngbawlna Gas lamah te harsatna kan nei lo chu Minister hmalakna leh remhriatna vang a nih thu sawiin kan ei leh bar tur mai pawh ni lo, Ration Card-a chuang lo raltlan tam tak kep thei khawpa buhfai bikah pawh kan hnianghnar thei chu thil lawmawm tak a ni a ti.

Kalkhawmte chu hma kan sawn em tih inteh a, inzawt fo tura chahin ram changkang ber ber te la pha rih lo mahila, kan tun dinhmun theuh atangin kan tlin tawkah hmasawnna kawnga ke pen zel tur leh insiamthat kan ngaihna laiah te insiam tha zel turin a chah a ni.

Pu V. L. Remliana, Mamit District Bawrhsap pawhin DCSO Office building thar tha tak mai kan nei ta chu hmasawnna ropui tak niin lawmawm a tih thu a sawi bawk.

FCS&CA Building sak hna hi Babie Construction & Consultancy te'n thawkin Estimate amount hi cheng Nuai 100 a ni a. March 2022 atanga sak tan niin a building len zawng hi 60 × 40 feet a ni. A Building chhungah hian Staff te luah tur Room pasarih awmin basement lamah Room pathum, mikhual thlen theihna tur Dormitory anga hman tur a awm bawk.

FCS&CA Office Building thar hawnna hun hi Pi Teresy Vanlalhruaii, MCS, Secretary, FCS&CA chuan a kaihruai a. Dr. Andrew H. Vanlaldika, Director, FCS&CA chuan kalkhawmte chungah lawmthu a sawi bawk.

Vawiin vek khan Minister hian Mamit-a DFDO Office building sakna hmun tura ruahman a tlawh bawk.

Minister hi Director & Secretary, Fisheries Department bakah FCS&CA Department Officials te'n an tawiawm a ni.

Attachment