661/2023-2024

Dated Serchhip, the 2nd June, 2023: Nimin leh nizan khan Pu Lalchamliana, Home Minister chuan a bial chhung khua E. Lungdar leh Sailulakah MZP ten tun hnaia zirlai tithate chawimawina hun an buatsaihah khuallian niin a hmanpui.

Nimin chawhnu khan E. Lungdara Thangburha Hall ah E. Lungdar Sub Headquarters MZP te buatsaihin E. Lungdar atanga zirlai tithate chawimawina hun hi buatsaih a ni a, he hunah hian Minister chuan, E. Lungdar khuain pawl sawm leh pawl sawmpahnih zirlai titha First Division leh a chunglama pass chawimawi tur engemawzat a nei chu lawmawm a tih thu a sawi a. A chhuang hle tih a hrilh a ni. Kum leh lamah chuan vawiin aia tam zawk chawimawi tur awm ngei thei se a duh thu a tarlang. Zirna hi hmasawnna a ni a, mithiam tamna ramah remna leh muanna te, hma lam pan zel tura hriatna leh thiamna a tam thin a ni. Ka bial chhungah kan theih ang tawkin zirlai tithate hnenah lawmpuina kan hlan thin a, kumtin lawmpui tur kan nei nual thin a a lawmawm hle. Amaherawh chu Laptop dawng thei tura Top Ten ni phak erawh kan la awm lo thung a, hetiang thleng thei zirlai neih hi ka chak hle a ni, a ti. A bul tan that hi hlu mahse a tawp lam tihthat tel a tul a, vawiina chawimawina dawn hi a bul tanna a ni a, a tawp thlenga kan beihzui a tul hle. A tawp lam báwk that hi a hlut em avangin vawiina chawimawina dawng ve ta lo First Division tlin ta rih lo te, pass zo ta chiah lo tante pawh insiamthata, nasa zawka inbuatsaihna hun a la awm a, beidawnna tur engmah a awm chuang lo a ni, tiin zirlai naupang te a chah a. Pathianin min pek kan hnam chhuanga, kan inchhuan avanga hnam dang ngainep chuang lo tur leh kawng tinrenga ram leh hnam tana hna tha thawktu nih tum tlat turin a chah a ni.

E. Lungdarah hian pawl sawm zirlai first division leh a chunglama pass mi pakuate hnenah chawimawina hi hlan an ni a, hetiang bawk hian pawl sawmpahnih first division leh a chunglama pass mi sawm te hnenah chawimawina hi hlan an ni bawk.

E. Lungdara zirlai titha chawimawina inkhawm hi Pu Joseph Zoremmawia, President, MZP, E. Lungdar Sub Headquarters in a kaihruaia, MZP General Headquarters aiawh leh E. Lungdar VCP Pu K. Lalngaizuala ten thusawina hun an hmang a ni.

E. Lungdara hun a hman zawh hian Home Minister hian Sailulak a pan leh a, zan lamah Sailulaka Zakapa Hall-a MZP Sailulak Branch buatsaih Sailulak khuaa zirlai tithate chawimawina hun buatsaihah khuallian niin a telpui leh a ni.

He hunah hian Home Minister chuan, kumin Sailulak High School atangin za zela sawmriatpaliin hlawhtlinna kan chang a, kan tichhe lo. A hlawhtlingte ka lawmpui rualin la hlawhtling ve rih lote kha lo hnual lo turin ka ngen che u a. Tha zawka hlawhtlinna chang thei tura bei sauh sauh turin ka chah che u a ni. Mizoram sawrkarin zirna a ngaihpawimawh avangin zirtirtu indaihlohna phuhru turin zirtirtu thar hi a la nasa hle tawh a ni, tiin sawrkarin zirna a ngaihpawihzia a tarlang a. Nasa zawka lehkha an zir zel theih nan an taksa enkawl uluka, a tichaklo thei thil tinreng lakah inthiarfihlim turin a chah a ni. Engkawngah pawh kal ila kan hlawhtlinna bul tur chu taihmakna a ni reng dawn a, tum fel tak neia taima taka umzuitute tan hlawhtlinna kawng zau takin a inhawng reng a ni, tiin zirlai naupangte a fuih a ni.

Sailulak MZP te hian zirlai mi 36 te hnenah chawimawina an hlan a, chawimawina an pek te hi HSLC pass thar mi 17, HSSLC pass thar mi 12, BA pass thar mi 5 leh B.Sc pass thar mi 2 te hnenah a ni.

Inkhawm hi Pu Zonunsanga, President, MZP, Sailulak Branch in a kaihruaia, Pu H. Dolianbuaia, MCS, Secretary, MIC pawhin thusawina hun a hmang a ni.

Home Minister in E. Lungdar, Sailulak leh a bial chhung khaw dangte a tlawh kual hi Pu Benjamin Lalzama, Director, DM & R chuan a tawiawm a ni.

Attachment

  • Loading attachment...