662/2023-2024
Aizawl the 2nd June 2023 : Nimin June ni 1, 2023 khan HIV leh a kaihhnawih natna inkaichhawn theih chi hrang hrang tanin (jail) leh khuahkhirh ngai enkawlna hmun hrang hranga hmalakna tur Integrated STI, HIV, TB & Hepatitis (ISHTH) Campaign chu Health Department Minister Dr. R. Lalthangliana'n a hawng. MINECO SAD Conference Hall-a hawnna inkhawm neih chu Principal Secretary, Health & Family Welfare Department Pi Esther Lal Ruatkimi’n kaihruaiin Prison, Health, Social Welfare, Women & Child Development Department official-te leh tlawmngai pawl aiawhte an tel a ni.

ISHTH Campaign hawngtu Health Minister Dr. R. Lalthangliana chuan thusawiin Central Jail leh District Jail-a tangte zingah HIV chungchanga hmalakna neih hi thil tul tak a ni a, Mizorama central jail pakhat leh district jail neihah te tang thei tur zat aia leta tam an awm laiin hriselna lama hnathawktute indaih tawk loh vanga harsatna a awm thin thu sawiin, department hrang hrangten tangruala hma an lakna tur ISHTH campaign chu thla 6 hnuah a rahchhuah duhawm a lan ngei a beisei tih a sawi a. Covid hrilen laia mipui an tanrual ang khan HIV dona kawngah pawh mitin tangrual ila tuna kan dinhmun aiin kan tha zawkin a rinawm tih a sawi bawk. HIV kaite enkawl leh an nun kaihhruaina kawngah Positive Women Network of Mizoram leh NGO dangte hnathawk fakin, Health Minister chuan Mizoram-ah HIV inkaichhawn zel hi tihniam turin leh he ISHTH Campaign hlawhtlinna atan theihtawp chhuahpui zel turin a sawm a ni. Mahni mihringpuite chu lainatna leh duhsakna nena thlir leh enkawl thiam a pawimawh thu sawiin Health Minister chuan sorkar, tlawmngai pawl, kohhran, media leh mipui zawng zawngten mahni mawhphurhna theuhah ngaiin Jail, Home leh hmun danga ISHTH Campaign beihpui thlak turah pawh thawhhona tha nen tangkai leh awmze nei zawkin hna thawk turin a chah a ni. He hunah hian thla hmasaa Confederation of Indian Industry (CII) Foundation-in rampum huapa hmeichhia hnathawk tha Woman Examplar Award,2023 (Health Category) lawmman a hlan zinga tel Pi Zohmangaihi, Secretary, Positive Woman Network of Mizoram hnenah chawimawina thuziak Minister hian a hlan nghal a ni.

Principal Secretary, Health & Family Welfare Department Pi Esther Lal Ruatkimi pawhin thusawiin Tanin (Jail) a tangte chu HIV leh TB kai theih dinhmun sang tak nei an ni a ti a. Integrated STI, HIV, TB & Hepatitis (ISHTH) Campaign hawnna hun kaihruaitu Pi Esther Lal Ruatkimi, Principal Secretary, Health & Family Welfare Department chuan kum 2021 chhunga rampum huapa tanina HIV leh TB hri kaithar chhut, mi nuai 62.9 zingah ram pum dinhmun za zela 1.93 anih laiin Mizoram chu sang berin za zela chhutin 26% kan nia, pahnihna Punjab chu za zelah 7.5 niin pathumna Nagaland chu za zela chhutin 4.6 an ni a ti. Mizoram tanin dinhmun hi a tha lo hle a, India ramah a sang ber a ni. Jail chhungah hian a awm thei zat aia tam an awm fo thin avangin natna inkaichhawn theih lakah an dinhmun a him lo fo bawk a ni. Central Jail-a tang mi 400 kawmna kum 2021 a neih atangin hengte hi hriat a ni:
• HIV chungchang kimchang taka hria - 84.3%
• Ruihhlova inchiu thin - 7%
• An tan puite sex hman pui thin -1.8%
• Sex hman hnuhnun bera condom hman dan: Kawppui nghet (regular partner) 11.7% leh kawppui satliah (casual partner) 25%. Principal Secretary chuan Jail chhunga HIV chungchanga hmalakna tihchangtlun a ngaih zia a lang chiang hle a, thil chiang taka lo lang chu heng tangte zingah hian HIV chungchanga hmalakna hi Jail chhunga kalpui hi thil tul tak a ni a, HIV test, ART damdawi tha taka ei tir bakah, HIV la kai lote venna tura chak taka hmalak a ngai a ni a ti a. Jail chhungah hmalakna Prison & Other Closed Settings-a kalpui mek a ni a. He hmalakna hi tihchangtlun a ngaihzia Central Jail data kan tarlan atang hian a lang a ni a ti bawk.

He ISHTH Campaign hi June thla chhungin hman tur a ni a, thla khat chhung awh tur a ni. He Campaign in a tum ber chu Jail tangte, harsatna tawk leh khuahkhirh ngai enkawlna hmun hrang hrang a awmte, HIV, TB, Hepatitis leh STI natna laka an inven theih nan leh natna nei ten enkawlna tluantling an dawn theihna tura ruahman a ni a. India ram puma hman tur a ni. Tun dinhmunah India rama Jail tang te zingah HIV kai an tam em avanga he Campaign hi Central sorkar buatsaih a ni a. Khawi hmunah pawh enkawlna tluantling a mamawh ten an hmuh theih nana buatsaih a ni. Jail tangte bakah Social Welfare & Tribal Affairs leh Women & Child Development ten an enkawl Home hrang hrang, Observation Home leh Ruihhlo ngai te enkawlna hmun pawh a huam tel dawn a ni.

ISHTH Campaign hawnna inkhawm hi Dr. Lalthlengliani. Project Director, MSACS in lawmthu sawiin he inkhawm hi khar a ni. 

Attachment

  • Loading attachment...