No.7906/2020-2021

Aizawl, 24th March, 2021: Agriculture Minister Pu C.Lalrinsanga, Cooperation Department changtu ni bawk chuan vawiin khan NABARD buatsaih State Credit Seminar chu Aijal Club-ah khuallian niin a hmanpui. He hunah hian Pi Mary Deng, General Manager, RBI leh Pi Lalmuanpuii, Chairperson, Mizoram Cooperative Apex Bank te chu khual zahawm an ni.

Minister chuan NABARD-in Mizoram mipuite tana thil tha tam tak a tih avanga lawmthu sawiin kum 2020-2021 atana NABARD-in Mizoram state tana credit projection a siam Rs.2003.78 ah 37% chu agriculture leh a kaihhnawih dang te a ni, a ti. Kum kaltaah Mizoram chhunga bank te Credit Deposit (CD) ratio chu 40% chauh a ni tiin pawi a tih thu a sawi a. Sawrkar kum tharah chuan CD ratio 60% tal neih tum turin a fuih. State Focus Paper kaltlangin Mizoram economy siam thatna turin NABARD chuan ruahmanna peng hrang hrang a siam a, heng te hi Bank te tanpuina tel lo chuan a takin a thleng thei dawn lo tih sawiin Pu C.Lalrinsanga chuan tan la lehzual turin bank hotute a ngen a ni. Mizo thalaite taima lehzual tura fuihin a huhoa intelkhawma theihtawp kan chhuah chuan kan hlawhtling dawn, a ti.

Guest of Honour pahnih Pi Mary Deng leh Pi Lalmuanpuii te pawhin thu sawiin NABARD hmalakna an fak a, Mizoram tana tangkai lehzual zawka ke penpuiah an sawm a ni.

Vawiin hian khuallian, Agriculture Minister Pu C.Lalrinsanga hian State Focus Paper a tlangzarh a. Kumin 2021 atana SFP thupui chu “Loneitute lakluh tam zawk nana a huhova thawh” tih a ni. Hemi hmang hian agriculture huangah thar chhuah a lo pun a,  lo neituten sum thahnem zawk an lakluh theih nan hmalak a ni ang.  Kum 2021-2022 inkara state chhunga priority sector hnuaia credit potential Rs. 2003.78 chu kum kalta aiin 10% in a pung a ni.

Vawiin programme-ah hian Primary Agriculture Cooperation (PACS) pathum- Champhai LAMPS, Vaphai PACS and Ratu LAMPS te hnenah sanction letter Minister hian a hlan a. NABARD hmalakna Joint Liability Groups promotion programme hnuaiah Vanapa Society leh Mizoram Rural Bank aiawhte hnenah sanction letter hlan a ni bawk.  Minister hian programme zawhah Aijal Club tual zawl atangin mobile van pasarih a vai liam bawk a. Heng mobile van pasarih te hi Bethel PACS, Khanpui PACS, Rabung PACS, Teikhang PACS, Darlung PACS, Maubuang PACS leh Ratu PACS te hman tur a ni.

Vawiin programme ah hian NABARD AGM Pu Evan T.Munsong chuan kalkhawmte lawmna thu a sawi a. NABARD Aizawl General Manager Pu SN Mallick chuan thuhmatheh a sawi bakah Pu T.Sudheer, DGM, NABARD chuan State Focus Paper chungchang sawi zauna hun a hmang bawk.


Attachment

  • Loading attachment...