No.7905/2020-2021

Mamit 24th March, 2021 : Vawiin khan CMO Office, Kumtluang Hall, Mamit-ah World TB Day hman a ni a. Er. H. Lalzirliana, Hon'ble MLA, Mamit chuan khuallian niin he hun hi a hmanpui.

Khuallian chuan thu sawiin nikum October, November leh December quarter chhunga health facilities nei tha lo tak chunga Mamit District-in TB dona kawnga Mizoram puma pakhatna an ni thei chu lawmawm a tih thu a sawi a. TB natna hi Kum 2025 ral hma ngeia umbo chu Sorkar laipui tum anih angin Mizoramah pawh TB awm lohna ram kan nih theih nan mitinin mawhphurhna kan nei a ni a ti. TB vei in-report duh lo leh inenkawl tha duh lo chu dan hmanga hrem theih an nih thu a sawi bawk.

National TB Elimination Programme (NTEP) hnuaiah TB damdawi hi athlawn veka lak tur a awm a. Anih dan tur ang thlapa damdawi ei, inenkawl ?hate'n thlatin Rs. 750/- thleng Cash incentive an dawn theih thu a sawi bawk. TB natna veite hi thinhrik mai lova enkawl dam theih a ni tih hria a, kan theihna zawn zawnah TB National Strategic Plan 2017-2025 tum angin TB awm lohna ram kan nih theih nana hmala theuh tur leh nasa zawka tan la zel turin thawktute chu a fuih a ni.

TB dona kawnga Mamit District-in pakhatna lawmman a dawn puala Cake buatsaih chu khuallian hian zaina hun a hmang nghal bawk.

Dr. Lalrozama, IAS, DC Mamit pawhin thu sawiin Mamit District-a Multi Drug Resistant TB vei damchhuakte a lawmpui thu sawiin an chhungte fakawm a tih thu a sawi a. TB natna veite chu an chenpui chhungkuain thinhrik mai lova hmangaih leh duat taka an enkawl a tul thu sawiin TB vei kan chhungkua-ah an awm anih pawhin hmangaih leh duat taka enkawl chuan an dam leh thei a ni a ti. Kum 2019-20 chhunga Mamit District-in TB vei a neihte 100% enkawl dam an ni chu lawmawm a tih thu a sawi bawk.

Dr. Lalmuanawma Jongte, District TB Officer chuan power point presentation hmangin TB dona kawnga Mamit District hmalakna hrang hrang report a pe a. Mamit District chu India ram pumpuia District hrang hrangte TB dona kawnga inelna-ah 22-na kan nih mek thu a sawi a. Tunah hian India ramah TB vanga thi hi minute 5 danah mi 2 zel anga chhut an nih thu a tarlang a. REC Limited CSR hnuaiah TB dona kawnga hman turin Cheng Nuai 2 dawn anih thu a tarlang bawk. Mamit District chhunga chhungkaw 1785-a mihring 8211 te chu TB an vei leh vei loh sample lak niin test tawh anih thu tarlangin Kum 2018 atanga tun thlengin TB vei Nutritional Support mi 195 hnenah pek tawh an nih thu a tarlang bawk a ni.

Kumin World TB Day thupui atan hian "The Clock is Ticking" tih hman a ni a. Dr. Zothankhuma Chhakchhuak, CMO, Mamit chuan he hun hi kaihruaiin Lalfawnliana, MDR TB vei, enkawl dam tawh pawhin thu a sawi a. Dr. Lalrinfela H, MO-TC, TB vei enkawl dam tawh chuan Programme khar nan lawmthu sawina a nei a ni.

Attachment

  • Loading attachment...