No.7904/2020-2021

Thenzawl, the 24th March 2021: Vawiin khan Governor PS Sreedharan Pillai leh Lady Governor Reetha Sreedharan te chuan lehlangin Thenzawl khaw chhehvela khualzinmite tlawh hlawh deuh bik hmun thenkhat te an tlawh.

Governor P.S. Sreedharan Pillai chuan Thenzawl leh a chhehvelah khualzinmite hip tur atana hmun rem chang tak tak sawrkarin a chei chho mek chu thil lawmawm tak a ni a ti a. Tourism hi Mizoram hmelhmang pholanna tha tak a nih rualin Mizoram tana sum dehchhuahna remchang tak pawh a ni nghal a. "Tunhma atangin Mizo mipuite chu mikhual laka that chhuah thin leh midangte duhsak tlat thin an ni a. Hei hian Tourism huangah Mizo te hian qualification an nei sa hrim hrim tih a ti lang chiang hle a. Heng nun zemawi leh Mizoram mawina te inpawlh hian Tourism-ah Mizoram hian hlawhtlin bak chu hmabak a nei lo a ni", a ti.

Mizoramah khualzinmite hipna tur remchang tak tak a tam tawk tih sawiin Governor chuan heng thil te hi pawnlamah nasa zawka auchhuahpui a ngai a. Pawnlammi tam zawk ten an hriat pawh a la ngai a ni a ti.

Vawiina Governor-in Thenzawl leh a chhehvel a fannaah hian Pu Amol Srivastava, SDO(Civil), Thenzawl leh Tourism Officer ten Governor leh Lady Governor te hi an tawiawm a. Thenzawl Golf Course & Resort, Vantawng Khawhthla, Dilpui, AH& Vety farm leh hmun thenkhat te Governor chuan a tlawh a ni.

Attachment

  • Loading attachment...