No.7903/2020-2021

Aizawl, 24th March, 2021 : School Education Minister Pu Lalchhandama Ralte chuan April thlaa Board Exam HSLC leh HSSLC  lo awm turah Covid-19 avanga inngaihhnathiamna a awm loh tur thu vawiin khan Tuivawl bial chhung a fan kualnaah a sawi.

Pu Lalchhandama Ralte chuan HSLC leh HSSLC Exam atan Covid-19 hrileng avangin syllabus chu zaa 30% a tihtlem a ni, a ti a. Hei bak hi chu  Exam buatsaih leh Evaluation-ah te inngaihhnathiamna a awm dawn lova, Board Exam lo awm tur hi zirna quality a hniam loh nan strict taka kalpui a nih tur thu a sawi a. Hetianga kum dang ang bawka Board Exam kalpui a nih dawn avang hian zirlaite chuan theih tawp an chhuah a ngai a ni, a ti bawk.

School Education Minister chuan Sikul hawn a nih leh tawh avangin zirtirtu zawng zawngte chu mahni post-a awm vek turin a chah a, zirtirna hun reilo te an neih chu zirlaite tan thahnemngai taka hmang tangkai turin a chah a. Covid-19 avangin sikul kaina hun tlem mah se, sikul luh theih hma pawhin zirtirtute chu a theih ang anga an zirlaite zirtirna kalpui tura tih an ni a, TV hmang te, Zirna huang youtube hmangte, Weekwise plan hmangtein zirtirna hi nikum April atang  khan kalpui a lo ni tawh a, a taka classroom-a zirtirna hun hi rei lo mah se, zirtirtu ten thui tak zirtirna hi an lo kalpui tawh avangin Board Exam pawh hi zirlaiten tha taka an hmachhawn theih beisei a ni, a ti.

Pu Lalchhandama Ralte chuan Covid-19 dona kawngah sawrkar, kohhran leh mipuite tanrualna avangin Mizoram chu a tuar nep pawlah a tang a, state dang nena khaikhin chuan covid vanga thihna pawh a tlem a, hei hi tanrualna leh mipuiten sorkar thu an awih rah a ni, tiin lawmthu a sawi a.

Minister hian Kaniphai, Tuiruang kam zawl panna kawng sial thar chu vawiin chuan zawhin Kaniphai hi a tlawh a.  Phai zawl ram tha chu hmang tangkai a,  hmar tlangdung mipuite tana chhenfakawm khawpa thar chhuah neih tum turin mipuite a chah a. A ram cheibawl leh tui lak dan turte ngaihtuah zui a nih tur thu a sawi.

School Education Minister hian nimin khan hmar tlang dung khaw hrang hrang Upper Sakawrdai, Palsang, Mauchar leh Zohmun khua te a tlawh a, vawiin ah hian Kaniphai, Zokhawthiang, N.Tinghmun, Khawpuar leh Vaitin te tlawhin heng khuaah te hian khawtlang hruaitute nen an khaw mamawhte a hmunah enin hnathawh dan tur a sawiho pui zel a ni.

Minister-in hmar tlangdung a tlawhnaah hian Minister hi SHC Chairman Pu Lalmalsawma Darngawn leh SHC Executive Member te leh SHC Member thenkhat te bakah  Pu Lalhmachhuana State Project Director Samagra Shiksha, Pu Lalfakawma SDO (Civil) Sakawrdai leh Officer thenkhatten an tawiawm a. Khawtlang hruaitute leh sorkar hnathawkten an lo dawngsawng a ni.