1270/2022-2023

Aizawl the 16th July, 2022 : Nimin ni 15.7.2022 (Zirtawpni) khan SAD Conference Hall-ah Telephone Advisory Committee meeting chu an Chairman Pu C.Lalrosanga, MP(LS) hovin neih a ni a, Mizorama BSNL te hna thawh leh hmalakna hrang hrang te sawiho a ni.

TAC Chairman Pu C.Lalrosanga chuan meeting a lo tel member te chu lo lawmin BSNL-in telephone lama hmasawnna hrang hrang sawihona hun an nei leh thei chu lawmawm a tiin he meeting hian hmasawnna ṭha zawk a hrin chhuah belh ngei a beisei thu a sawi. Pu Rosanga chuan Mizoram hmun hrang hrangah signal ṭhat tawk loh avanga mobile phone hman harsatna la awmte a theih ang anga tih changtlun leh thuamṭhat a ṭul hle a, a bik takin ramri dep hmun hrang hranga signal awm ṭhat loh avanga mobile phone hman hleih theih lohna hmunah te signal ṭha zawk a awm theih nan ṭanlak thar a ṭulin, hetiang hmun a hmasawnna thawk tur  hian a ṭul ang angin hma kan lak ho a pawimawh hle ani a ti. Heti rual hian heng signal ṭhat loh leh chak tawk lohnate  thuam ṭha tur hian sum lamah harsatna a awm avangin duh anga hma lak a harsa a, sum harsatna karah ṭhahnemngai taka thawktu, General Manager leh a thawhpui officer leh staff te inpekna chu a lawmawm a, hma lam pana an thawh zelna turah a ṭul anga theih tawp chhuahpui a inhuam reng a ni a ti.
  
Pu Rosanga chuan Mizorama inbiakpawhna leh thu thawndarhna lamte thuamṭhat a nih zel theih nan Communication Minister a dawr tawh thu sawiin BSNL hote harsatna leh mamawhte la hriattir zel a tum thu a sawi a. Mizorama Internet a lo chak zawk theihna tura bandwidth tam zawk a awm theih nan Optical fibre cable la thlen lohna district zawng zawng thlen tir tura thuneitute dawr zui a tum thu a sawi. Mizorama licence nei mumal lova internet connection lo pechhuak ṭhinte an awm ni a sawi chungchangah MP chuan dan ang taka hmalak ṭul a tih thu a sawi bawk.
 
Tun dinhmunah hian Mizoram pumah BSNL hnuaiah hian Mobile connection 259455, Landline connection 6926, FTTH connection 7885, Wi-Fi Hotspot 15, Working Broad Band 2685, Exchanges Wired 39 leh BTSs Mobile 336 a awm mek a ni.
  
Meeting ah hian TAC members Pu Lalliankima, Pu HC Vanlalruata leh Pu Zomuanthanga te bakah BSNL General Manager hovin officer leh staff ṭhahnem tak an tel.



Attachment

  • Loading attachment...