Vawiin khan DM&R Minister Pu C.Ngunlianchunga hovin Lawngtlai DC Conference Hall-ah tun hnai ruah surin Lawngtlai District-a chhiatna hrang hrang a thlen chungchanga hma lak zui dan tur Lawngtlaia office hrang hrang hotute leh tlawmngai pawl ai awhte’n an sawi ho.
He hunah hian department hrang hrang hotute chuan ruah sur leh tui lian vanga an department hma laknaa harsatna an tawhte an sawi a. Pu C.Ngunlianchunga chuan tuna chhiatna thleng hi state pum huap a nih avangin sawrkar laipui paw’n theih tawpa mi a ngaihtuah thu te, Lawngtlai District-ah pawh department hrang hrangte tang tlanga hma lak ho a tul thu te a sawi a. L-III-a lei che chuan kawngpui pawimawh tak a nghawng tel avangin a rang thei ang bera chin fel dan ngaihtuah nghal ni se, a ti a. Kawngpui pawimawh bikte chu ngaih pawimawh hmasak ni se, chhiatna thlengte pawh a changtu department-te’n en fiahin dik taka report pek thin ni se, he thil thleng vanga hri leng a awm chuan Health department lamin rang taka bawhzui nghal ni se, a ti bawk.
Department hotute’n an report danin, hriat theih chinah tun tuma ruah sur leh tui lian vang khan Lawngtlai District-ah thi pakhat awmin, luah tlak lohva in chhia 350 chuang leh chhe nial nual 300 chuang a awm a. Sikul chhia 11 report dawn niin, kawng kal tlang theih lohva chhia hi KM 65 vel a awm. PWD lamin kawng titlang tur hian hma an la mek a. Khua a that chuan Diltlang – Chawngte kawng ping mek chu kar khat chhungin tihtlang hman beisei a ni.
Buhfai lamah Tuithumhnar, Damdep leh Vathuampuia monsoon stock-ah thla 2 daih, thla 3 daih leh thla 4 daih theuh dah tawh a ni a. Kudam dangah pawh harsatna em em awm lo tura ngaih a ni. Thli leh ruahin kawlphetha pekna a tihchhiat chu department lamin an siam tha kim tawh a; tun dinhmunah chuan a chhia hriat a ni rih lo. Greater Lawngtlai Water Supply Scheme hnuaia Lawngtlai khawpui chawmtu tui lak chu tui lian hian a pump part thenkhat a tichhia a, hei hi a thara thlak thuai a ngai dawn a ni. Ruah sur, tui lian leh lei minin lo, huan, sangha dil leh ran vulh a tihchhiat a awm nual a. Tui lian vanga hri leng hriat a la awm lo va, hri leng thei kawthalo laka inven nan Health Department chuan tun ruah sur hma khan ORS leh Zinc tablet an lo sem hman tawh a ni.
He’ng chhiatna hrang hrang thlenga chhawmdawl nan hian Lawngtlai District Disaster Management Authority chuan sawrkarah pawisa a dil mek a. A theih ang angin chhawmdawl hna pawh thawh chhoh mek a ni.
Vawiin thut khawmah hian department hrang hrang hotute leh tlawmngai pawl ai awhte bakah, LADC CEM ai awhin EM Pu C.Lalneihkhuma leh DM&R changtu EM Pu C.Lallungmuana te pawh an tel.
