Vawiin chawhma dar 11:00 AM khan Saiha College venga Laila Hall-ah NLUP Revitalization Programme hman a ni. He NLUP Revitalization Programme hmanna-ah hian Pu C.Ngunlianchunga, Minister, AH&Vety, DM&R etc. chu khuallian niin, Pu L.C. Chakhai, Chairman, MADC chu khualzahawm a ni thung. He NLUP Revitalization Programme hi Pu R.Zarzosanga, Saiha District Bawrhsap leh District Level NLUP Committee Chairman ni bawk chuan a kaihruai.

Pu C. Ngunlianchunga chuan Central Sawrkar in Mizoram sawrkar hmalakna NLUP kalpui dan dik tak a hriat in, tha a ti hle a. Kum 2014-15 atana Planning Commission-in NLUP atana sum a lo ruahman tawh leh, Special Plan Assistant (SPA) leh Additional Central Assistant (ACA) a lo ruahman, cheng Vaibelchhe 496.99 pawh karkhat chhungin a vaiin State Account-ah a thun fel a, hetah hian NLUP sum Cheng vaibelchhe 317.32 pawh a tel a ni, a ti a. Hei hian Central sawrkar in Mizorama mi rethei leh kuthnathawktute mi harsa zawk te’n leirem an rah theihna tur ruahmanna NLUP chu tha a ti a, an hmakhua a ngai tih a ti lang chiang hle a ni, a ti bawk.

Pu Ngunlianchunga chuan NLUP atan Department dangte sum pawt peng anga sorkar puhna chu thil diklo a ni a ti. Kum 2002-2008 chhunga Mizoram sawrkarin central atanga SPA/ACA a dawn chu, chawhrualin kum tin cheng vaibelchhe 51 vel a ni laiin, NLUP pian hnu-a NLUP avanga kum 2010-14 chhunga a sum hmu chawhrual chu kum tin cheng vaibelchhe 716.13 a ni a, a let 14 velin a pung a. Department dang chanai sawh hek a ngai lo a, NLUP hi mahni intodelh Project a ni, a ti bawk.Minister chuan NLUP 3rd & 4th Phase Beneficiaries kalkhawmte chu 1st leh 2nd Phase Beneficiaries te aia tih that tum turin a chah hlawm bawk.

Vawiin Programme hmanna-ah hian Minister chuan NLUP Line Department tin atanga NLUP Beneficiary titha, entawk tlaka an ngaih pakhat theuh an thlan chhuah te hnenah lawmpuina Citation a hlan nghal bawk.

Vawiin Programme-ah hian, NLUP 3rd & 4th Phase Beneficiaries te, NGO’s hrang hrang hruaitute, veng hrang hrang VC, Head of office te leh chanchinbu mi te an tel kim hle a. Minister hi LADC leh MADC-a EM leh MDC ten an tawiawm a. Khualzahawm Pu LC.Chakhai pawhin thusawina hun a hmang bawk.