March ni 17 - 20, 2015 chhungin Boys Hockey Academy, Kawnpuiah Mizoram Hockey Association chuan tournament danglam tak buatsaih a tum.

He tournament-ah hian MHA hnuaia team tha zual 4 (super 4) chauh an inel dawn a, Mizoram Hockey Association chuan kum 2015-a ram pum huap inelna, National Championship hrang hrang awm turah team tha tak tirh a tum a, chumi atana inpuahchahnaah he tournament hi a hmang nghal dawn a ni.

Pu Hmingdailova Khiangte, President MHA leh Parliamentary Secretary, Sports etc. ni bawk chuan Senior level-ah kan la che tha vak thei lo chungin, inbuatsaihna tha tak kan neih phawt chuan sang tak pawh kan thleng thei. Ruahmanna fel leh tha kan neih hmasak a ngai a, National level-ah hniam tak atanga bul tan kan hreh lova, hma kan sawn theihna tur a nih chuan theihtawp kan chhuah zel dawn a ni. Junior leh Sub-Junior level-ah kan lan hmasak phawt a ngai a, rahbi thar rapa hmasawn chho zel turin ruahmanna kan siam a ni. Mizoram mipui beisei tihhlawhtlin hi kan chak takzet zet a ni a ti.

Parliamentary Secretary chuan Aizawl Khawpui chhungah Hockey Ground kan la nei lo chungin veng pakhat field hmangin Hockey Centre tur sak mek a ni a, chumi atan chuan Trainer turte leh hmanruate ngaihtuah mek leh tihfel mek a ni bawk. Regiment leh Service hrang hrangah kan player tha zualte an lut zel a, hei hi an chhungte tan thil tha tak nimahse hockey-ah Mizoramin rahbi thar a rahna tur leh melllung a phunna tur chuan kan player neih thatten Mizoram aiawha hlawhtlinna an sualchhuah phawt a tul a, hei hi tihmakmawh a ni a ti.

Pu Lalthazuala Rawite, Joint Secretary, MHA pawhin Sports Minister leh Mizoram State Sports Council-te duhsakna kan dawng nasa em em a, kum dang ai zawngin tan pawh kan la nasa tawh. India ram pum huapah Mizoramin hming a chher a, dinhmun sang kan luah ve ngei hi kan hotute duhthusam a ni tiin sawrkar laipuiin nasa taka hockey tihlar leh vuaklen a tum mekna kawngah Mizoram chu chhawr tangkaitu zinga tel ve ngei tura hma an lak dawn thu a sawi bawk.

Team 4 chauh khelh tur MHA tournament-ah hian Police team 2 leh Kawnpui khaw team 2 te an inel tir phawt dawn a, hei aia tournament lian zawk, ram pum huap leh Mizoram Hockey chanchina hriatreng tawh tur tournament ropui tak siam tumin inbuatsaihna an neih tan mek bawk thu MHA hruaitute chuan an sawi bawk.

Attachment

  • Loading attachment...