Mizoram Journalists’ Association, Lawngtlai buatsaih ni thum awh tur free clinic chu vawiin chawhma dar 10 khan MJA Press Club, Lawngtlaiah AH & Vety Minister Pu C.Ngunlianchunga’n a hawng.

Khuallian Pu C.Ngunlianchunga chuan mipui rawngbawlna atana MJA te’n free clinic an buatsaih chu lawmawm a tih thu sawiin, hemi atana MJA te’n an chah chhuah Dr PC Lalramenga leh a thawhpuite inpekna a fak a. Doctor mamawh ber bertu chu mi rethei, damdawi in tha panna pawh nei lote an ni fo tiin, chu’ng mi retheite ban leh pan phak tura doctor leh khawl tha chhawp hnaihsak an ni chu thil ropui tak a ni, a ti. Mizorama doctor indaih lohna avangin Lawngtlaiah pawh an duh ang doctor an awm theih loh thu sawiin, Khuallian chuan tlang hrileng tamna Lawngtlai District tan khawl tha leh damdawi lam thiam mi tam zawk dah an nih theih nana theihtawp a chhuah thinna chuan rah tha a chhuah zel a beisei thu a sawi.

Minister chuan Mizoram Health Care Scheme hnuaia mi retheite tana hamthatna awm theite chu a mamawh takte’n an chhawr zel theih nan khaw tinah thla la turin department lam mi an kal zel tawh dawn tih a sawi a. Sawrkarin mipui ngaihsakin an hamthatna tur a zawng ngar ngar a, sawrkar thil tum a hlawhtlin theih nana theihtawp lo chhuah ve chu mipuite mawhphurhna a ni tiin, chuti ang lam chu ngai pawimawh turin kal khawmte chu a sawm nghal bawk.

Hawnna inkhawm hi Lawngtlai MJA Vice President Pu Lalngheta Ralte-in kaihruaiin, Lawngtlai MJA President Pu ZD Dengngura'n inlawmna thu a sawi a. Minister hian inentir zinga a rethei zualte damdawi leisak nan Lawngtlai MJA hnenah Rs 5000/- a hlan a. Amah hi doctor-te chuan an lo en ve nghal a ni.

Lawngtlai MJA hian kum 2013 khan ni hnih awh free clinic an lo buatsaih tawh a. Chumi tum chuan mi 430 an inentir a ni. Tun tuma an free clinic buatsaih hian June ni 1-3, 2016 thleng a awh dawn a. Hemi atan hian Aizawl atangin Dr PC Lalramenga bakah, doctor dang panga an lo kal a; anni hian lung enna leh khawl dang eng emaw zat an rawn keng bawk.