Vawiin chhun dar 12 khan Lawngtlai District Deputy Commissioner Dr A.Muthamma chuan Lawngtlai District Hospital a tlawh a. Damdawi in dinhmun leh mamawhte a en fiah.
DC hi Additional DC Pu R.Lalsangluaia, Election Officer Pu Lalhmansanga, Chief Medical Officer Pu HC Thangkima leh DIPRO Pu C.Lalhruaitluanga te’n an tawiawm a. Damdawi ina thawk doctor leh nurse te’n lo dawngsawngin, an hnathawh dan leh harsatna hrang hrang an neihte a hnenah hian an lo thlen a ni.
DC chuan damdawi in chu mipuite tana din a nih ang ngeiin, mamawha pantute chu ngaihsak a, ngai pawimawh turin thawktute chu a fuih a. Damlo enkawlna hmanrua reng reng chu fai leh thianghlim taka vawn tur a ni tiin, khawl te pawh uluk taka enkawl a tul thu leh rikrum thila mamawh zualpui tur chu awlsam taka lak mai theih tura dah thin tur a nih thu a sawi.
DC hian damdawi in room leh ward hrang hrang bakah, building thar luah mai theih tura sak zawh tawh te pawh a fang a. Damdawi in tihchangtlunna tura thil pawimawhte chu thawktute’n a hnenah thlen thin se a duh thu leh ani paw’n a theih anga a bawhzuipui tur thu a sawi bawk.
