Vawiin khan Chief Minister Pu Lal Thanhawla hovin State Level Green Mizoram Committee chu New Secretariat Conference Hall ah an thukhawm a. Meeting ah hian Environment, Forests & Climate Change Minister Pu Lalrinmawia Ralte, Chief Secretary Pu Lalmalsawma , Principal Chief Conservator of Forests Pu Lalram Thanga leh Environment, Forests & Climate Change Department hotulu dangte leh State Level Committee Member te an tel a ni.

Pu Lal Thanhawla chuan Green Mizoram Day hi kumtin kan hmang thin a, hma pawh kan sawn a, awareness te pawh kan nei tha tawh a, a pawimawhna pawh mipuiin kan hrethiam chho zela, mahse kan thing phun tawh te enkawl zui leh venhim lamah tan lakna tur kan la nei a, nasa leh zawka hengte hi venhim leh enkawl an ngai a ni, a ti a. Kawng kam thlenga lo leh leipui vat thin ten kawng kam roadside plantation-a thing phun nung tha tak leh roadside reserve ah thing an ti kang fo thin chu a ngaihmawh thu sawiin heng thing phun te venhim anih theih nan khawtlang leh tlawmngai pawl te nen tang hova hmalak a tul thu a sawi bawk.

Chief Minister chuan thing leh mau kan neihsa te hi kan phun belh loh chuan rei min daih dawn lova, sik leh sa inthlak danglam avanga boruak lum global warming in min ti buai chho zel a, a tlai lutuk hma in thing phun hi kan uar chhoh zel a tul a ni, a ti a. Green Mizoram Day hman tan atangin mipuia thing phun pawimawhna a tlak nat thu sawiin mimal,pawl leh khawtlang anga thing, ramngaw, ramsa humhalh leh lui dunga nungcha humhalh nachang leh a pawimawhzia kan hria te hi hmasawnna ropui tak ani a ti a. Mizoram chu India a green cover nei tam ber kan ni a, mahse ram ngaw tak tak, dense forests ang chu za zelah 1 vel chiah kan nei a, chuvangin tan lakna tur ka la nei a ni, a ti bawk.

Environment, Forests & Climate Change Minister Pu Lalrinmawia Ralte chuan thing phun te a nung that leh that loh enzuina lamah tan lak a ngaih thu leh a nun dan survival rate te vil a tul thu a sawi a. Roadside plantation a thing phun kang thin te veng turin tan lak a ngaih thu a sawi bawk.

Environment, Forests & Climate Change Minister Pu Lalrinmawia Ralte hova May ni 13 2016 a Sub Committee on Green Mizoram thukhawm in rawtna an lo siam tawh te chu State Level meeting ah hian sawiho hnuin a tam zawkte chu pawm a ni a. Meeting chuan kumina Green Mizoram Day thupui atan ‘Thing phun la, boruak thianghlim siam rawh’ tih chu a pawm a ni.

Kumin Green Mizoram Day hi June ni 11 ah hman tura rel ni tawhin a programme pui ber chu Thenzawl ah hman tura ruahman a ni a, he programme hi Chief Minister in a hmanpui tura beisei a ni. Green Mizoram Day programme pui ber chu Serchhip District ah hman a nih dawn avangin Serchhip District ah hian a hranpa District Level Green Mizoram Day programme buatsaih a ni dawn lova, District dang 7 ah chuan he programme hi huam zau taka hman tura ruahman a ni ang. Green Mizoram Day programme ah hian District Level-a kangmei venna kawnga khua titha te hnenah chawimawina hlan tura ruahman a ni bawk. Meeting hmasa in a lo rel tawh District tin a DFO ten NGOs te sawm a kum 1 ah vawi 2 tal uluk taka Green Mizoram Programme hnuaia thing phun te chu vil thin nise tih chu meeting chuan tha tiin tih ngei nise tih a rel a. Mimal, pawl, NGO-te leh institutions te thing phun leh ramngaw venhima kawnga ti tha te hnenah chawimawina pek rawt chu huamzau leh felfai zawka ruahmanna siam nise tih an rel bawk.

Tarlan tawh angin Green Mizoram Day hi kum 1999 atang khan hman tan tawh niin 1999 atanga 2015 thleng khan Green Mizoram denchenin thing tiak 44,05,020 phun a ni tawh a.