Vawiin khan AH & Vety Minister Pu C.Ngunlianchunga chuan I&PR Conference Hall ah PRISM rising day vawi 9-na lawmna programme a hmanpui.

Pu C.Ngunlianchunga chuan PRISM hmalakna fakin kuttlinglo a sum lak dona kawnga an an inpekna chhuanawm a tih thu a sawi a. An thiltih leh hma an lakna kawng tinrengah tum chiang  tak neia kal tur leh an hlawhtlinna tur kawngah hmachhawn tur hautak a awm pawha tim mai lo turin a chah a ni. Kuttlinglova sum lakluh duhlo leh pawiti theuh te hian mimal inhuatna leh intihchhiat duhna avanga PRISM hmanrua hman tum an awm a nih pawhin remchang siamsak lo tura sawmin Minister chuan an thil hriat apiang thudik anga pawm mai lova fianfiah zel turin a chah a. An hmalak dan kawngte inang vek lo mahsela sawrkar leh PRISM chuan kuttlinglova sum lakluh leh mi rethei chanai eisak chu an do dun tlat a ni, a ti bawk.

PRISM rising day lawmna inkhawm hi an Vice President Pi H.Lalhmingthangi’n a kaihruai a. An President Pu Vanlalruata’n thuchah sawiin General Secretary Pu R.L. Liantluanga’n an pawl chet vel dan tlangpui a tarlang a ni.

PRISM rising day lawmna inkhawmah hian an member-te bakah tlawmngai pawl hruaitute leh political party hrang hrang aiawhte an tel.