Tuichangral zirlai Pawl General Assembly vawi 8-na chu ni 3rd - 4th, Nov, 2016 chhung khan Saihnuna Hall, Leng-ah neih a ni a. He General Assembly neihah hian AH & Vety Minister, Pu C.Ngunlianchunga chu Khuallian niin, Mizoram State Women Commission Chairperson leh bialtu MLA ni bawk Pi Vanlalawmpuii Chawngthu chu Khualzahawm a ni.

Khuallian Pu C.Ngunlianchunga chuan, Tuichang ral zirlai pawlten an Assembly hmanpui tura an sawm avangin lawmhthu a sawi a, bialtu MLA fel tak Pi Vanlalawmpuii Chawngthu a telpui theih avangin lawmthu a sawi bawk. Hrangturzo bial chhungah zirna kawnga mi hlawhtling leh entawn tlak tam tak an chhuak tawh tih sawiin, an hnung zui tur thalai lehkha thiam leh mi puitling tam tak an la rawn chhuah zel a beisei thu a sawi bawk. Zirlai chuan lehkha a zir lai atangin eng nge a kawng tur, eng nge a tui zawng, eng hna hi nge a dam chhungi n thawk se atan tha ang tih a zawn thiam a ngai a. Pathianin mitinte hi tuina leh theihna kawng in anglo tak tak min pek avangin kan kawng tur kan hriat chian a tul tak zet a ni, a ti. Tin, kut hnathawh kawng tinreng zahpui lova a tul apiang thawk bawrh bawrh zel turin zirlaite chu a chah a ni.

Minister chuan, kumin chhungin Mizoramin ruahtui kan dawng nasa a, heng avang hian tum lawk loh chhiatna chi hrang hrang a thleng thin, heng chhiatna tam tak hi pumpelh theih a ni ve tih sawiin, chhungkua leh zirna inah te kan tu leh fa, kan nupui fanaute hnenah fimkhur taka nun leh hun hman dan zirtir a tul zia a sawi a ni.

Khualzahawm Pi Vanlalawmpui Chawngthu pawhin thu sawiin, zirlai pawl ten intihchak tawn nan inkhawmpui leh programme chi hrang hrang an buatsaih thin chu lawmawm a tih thu sawiin, chutih laiin kan phak tawk leh kan tlin tawk hre reng chunga heng khawmpuite buatsaih nachang kan hriat a tul a ni a ti a. Zirlai kan nih ang takin kan rilruah kan zirna lian ber zel se a duh thu a sawi a ni. Zirlaite chu tum bulfuk tak nei, eizawnna, kal tumna, nih tum fel tak neia kal hi kan tih tur, kan hlawhtlinna bul ani, a ti bawk. Tin, incheinate, tunlai hmanraw changkang ber berte hi thalai tan chuan a itawm em em thin a, amaherawhchu, chungte chu kan nun tibuaitu leh engto berah neilo ngam ila kan sawtpui hle ka ring a ti a ni.

Tuichangral Zirlai Pawl General Assembly hi kumtin neih thin a ni a, Aizawl leh Tuichangral huam chhung khua-ah a inchhawka neih thin a ni a. Kumin General Assembly-ah hian Tuichangral huam chhunga khaw 13 atangin zirlai 300 chuang an kal khawm a, Pu C.Ngunlianchunga chuan Assembly tanpuina thilpek a hlan bawk a ni.