Health Minister Pu Lal Thanzara hovin vawiin khan Health Deparment a Officer leh thawktu pawimawh ten Chief Minister’s Conference Hall ah Health Department chhunga thu pawimawh tak tak ngaihtuah hovin an thukhawm.

Health Department hi a pawimawhin a huamzau va, Mihring hnuk nena inkaihhnawih khawihtu pawimawh tak an nih avangin a thawktu te tan pawh fimkhur leh ngaihtuahna senga thawh a ngaih avangin ngaihtuah ho tur thu pawimawh tak tak a awm thin thu sawiin Pu Lal Thanzara chuan vawiinah District lama thawktu leh hotu te nena an thukhawm thei chu lawmthu a sawi.

Kan ramin hma a sawn chhovin mihringte pawh kan pung zel a, chutih laiin thawktu lam a bik takin Doctor indaihlohna a nasa a, Sorkarin mipui leh khaw hrang hrang mamawhna phuhruk tura ruahmanna a siam leh Doctor te sawnkual anih thin naah khawimaw laiah khaihlakna siam an awm thin chuan hmalakna kal mek a tih bahlah fo thu Health Minister chuan sawiin rualkhai taka hmala turin ngaihtuah ho a ngaih thu leh District tina Medical Superintendent leh hotu ten an huam chhunga indaihloh dan leh mamawh te chiang taka report tur in a hrilh nghal a ni.

Thu pawimawh tak tak ngaihtuah ho zingah Water Treatment Plant chungchang zir chianga rel ho a ni a. Kum hmasa lamah Intergent Energy Ltd, Ashok Vihar,New Delhi te nen MOU signed in Damdawiin thenkhat Aizawl Civil Hospital,Refferal Hospital Falkawn, Champhai,Mamit leh Lawngtlai ah te tui thianghlim supply tura Solar Pumping Water bun a lo nih dan leh tunah he khawl hian tui a supply that tawh loh dan te sawiho a ni bawk a. Hma lak zui theih na turin heng Solar Pumping Water bunna hmun Damdawiin Medical Superintendent theuh te chu he mi chungchang hi bawhzuia report kimchang tak thehlut tura hriattir nghal an ni bawk.

Health Department Officers meetingah hian Health & Family Welfare Departmenta Commissioner leh Officer dangte bakah District tina Medical Superintendent leh Chief Medical Officer te an tel kim hle.