Vawiin chhun khan I& PR Auditorium ah FORMER LEGISLATORS ASSOCIATION OF MIZORAM ( FLAM ) chuan General Body Meeting an nei a. Pu C T Zakhuma Chairman Aizawl Municipal Council chuan a hman pui.
1st July 2008 atanga Aizawl Municipal Council ( AMC) indin chhoh dan leh inrelbawl chhoh dan sawiin khuallian Pu C T Zakhuma chuan a tira an kalhmang chu zir chawp leh state dang tihdan entawn bakah, lehkhabu lam atanga inzir chho an nih dan te,tunah kum tam pawh a ral hma a Aizawl khawpui tih hmasawnna tur atana an hmalakna hlawhtling tak tak hmuhtheiha a lang chho chu lawmawm a tih thu a sawi a .Thatlai leh vanglai huna ram leh hnam tana thawktu mi pawimawh tak tak FLAM member te inhmuhkhawm naa a tel theih avanga lawmthu sawiin an pawl kal zelna atana an hman turin Rs 20,000/- (singhnih) a hlan.
AMC hnathawh leh hmalak dan sawiin AMC Chairman chuan Sum tamtaka kan lei lirthei te kawngsirah daha, zan riah tir mai a him loh thu leh Garage nei lo chuan lirthei pawh lei loh ngam mai tur a nih thu leh LSC kan neih vang ringawta in sa mai lovin kan LSC chhunga leilung dinhmun hrechianga in sak a pawimawh thu a sawi a . Mipui te him zawk nana insak bul tan anih atanga AMC in an enpui chhoh dante, bawlhhlawh paih (Solid Waste Management ) chungchanga an hmalak dan te a sawi a, tunah hian Aizawl khawpui chhung bawlhhlawh paih nan thla tin Cheng Nuaih sawmli chuang sen ral a nih laiin veng thenkhat leh khaw thenkhat te erawh chuan sorkar kut ring mai lovin an mahni khawtlang intum chawp a hnawmhnawk thianfaia motor hire na thleng intum a hma an lak dan sawiin fakawm leh entawntlak an nih thu a sawi .Tun atanga kum nga ah chuan Motor parking ah te, insak dan leh thianghlim na kawngah te nasa zawka hmasawnna a lanchhuah a beisei thu a sawi bawk a ni.
Vawiin programme hi Pu K L Rochama FLAM President chuan kaihruaiin kum a lo tam tawh avanga in ngai upa mai lovin, enge kan la tih theih tih ngaihtuah chungin Ram leh Hnam tan thil tangkai tak tak kan la ti thei a ni tih hria a ngaihtuahna te a tha zawng leh hmasawn zelna tur atana seng thiam tur in member te a fuih. Chawhnu lamah Zawhna leh Chhanna hun hman zui nghal a ni a. Pu H Lalruatliana Superintendent leh Pu Vanlalsawma Executive Officer, AMC a mi ten he hun hi an hmanpui a ni.
FLAM hi October ni 24, 2004 a din kha niin an member 44 zetin mual an liam san tawh a, Member te hi inhmukhawm thin in inrenchemna kawngah te, thil thleng pawimawh te sawikhawmin seminar-te an nei thin a, Assembly Annex-ah office an nei a ni.
