3534/2023-2024

Aizawl, the 27th January, 2024: Power & Electricity (P&E) Minister Pu F. Rodingliana chuan January ni 24, 2024 (Nilaini) chawhnu khan New Delhi-ah Pu RK Singh, Union Minister for Power and New & Renewable Energy chu a pisa-ah hmuin kawlphetha siam chhuah kawnga Mizoram a intodelh theih nana mamawh leh hmachhawp hrang hrangte a thlen a. P&E Minister-in a hnena a thlen angin Union Power Minister Pu RK Singh chuan Mizoram tan 10% Gross Budgetary Support hnuaia Power project 6 thawhna tur sum, cheng vaibelchhe 273.21 chu DONER Ministry lama tihfel ngai la awmte tihfel nghal a nih tur thu leh a rang thei ang bera release tir a tum thu a lo tiam a ni.

Union Minister chuan tlangramin a bawh vel Mizoram te ang mil tur Small Hydel Project siamna tur scheme thar chu cabinet pawmpui tura chhawpchhuah mek a nih thu sawiin, pawmpuina hmuh a nih veleh proposal thehlut tura an rawn hriattir nghal tur thu a sawi a. Rooftop solar subsidy rate chu 40% atanga 60% ah tihsan a nih tur thu sawiin, phalzat bituk awm lova proposal lut ang ang an lo pawmsak tur thu a lo hrilh bawk a. Tunlai thiamna thar ber hmanga Pumped Storage Hydropower Project Mizorama hman a nih ve theih nan he project kalpui mekna State, West Bengal leh Andhra Pradesh-ahte hmalak dan kimchang zir chiang turin Mizoram atanga study team tirh P&E Minister-in a dilna chu Power Minister chuan a remtihsak bawk a ni.

Pu RK Singh chuan kawlphetha lak leh sem dan kalphung tihchangtlunna tur Central Scheme Revamped Distribution Sector Scheme (RDSS) hnuaia hnathawh tur smart metering leh thil dangte chu tun financial year chhung ngeia pawisa release nghal a nih tur thu Pu F. Rodingliana hi hrilhin, Mizoram chhungah eng la dawng ve lo khua emaw, chhungkua emaw an awmloh nana hma la turin a chah a ni. Mizoram leilung leh kawng awmdante'n a zirloh avangin scheme leh project hnathawhnaah bungraw phurh kualna man (transportation cost) a sang bik dan Minister-in a hrilh chu Union Minister chuan a lo hriat thu sawiin, project proposal amount sang deuh bik a awm pawhin ngaihnathiamna nen an lo ngaihtuah zel tur thu a sawi bawk.

He inkawmhona hunah hian Central Power Ministry peng hrang hrang hnuaia Secretary leh Director-te an tel kim hle a. P&E Minister hi Pu Alexander V. Chongthu, Addl. Resident Commissioner, Mizoram House, New Delhi-in a tawiawm bawk a ni.

January ni 24, 2024 vek khan Minister Pu F. Rodingliana chuan Pu Parshottam Rupala, Union Minister for Fisheries, Animal Husbandry and Diarying chu New Delhi-a a chenna inah hmuin Bawng leh Kel vulhna tur project Mizoramin a thehluh tawh chu a bawhzui a. Central Scheme hnuaiah project tha tak tak a awm thu Union Minister chuan lo hrilhin bawhzui dan tur leh hmalakzui dan turte a lo kawh hmuh a; February ni 15, 2024 hmaa bawhzui leh turin a lo chah a ni.