3533/2023-2024

Dated Siaha 26th January 2024: Vawiin khan India ram dangte rualin District Playground, Vaihpi, Siahaah India Republic Day vawi 75-na chu ropui leh urhsun takin lawm a ni a. He hunah hian Pu Lalhmunsanga Hnamte, Deputy Commissioner, Siaha chu khuallian a ni.

Khuallian Pu Lalhmunsanga Hnamte chuan zing dar 11-ah District Playground, Vaihpi, lo thlengin hnam puanzar a pawtparh a, Parade contingent-ten hnam puanzar zahna chibai an buk a chhang let nghal. Thusawina nei chhunzawmin Pu Lalhmunsanga Hnamte chuan Republic Day vawi 75-na lawm tura lo kal khawm zawng zawngte zahna chibai a buk hmasa a. Kum 1950 vawiin angah khan khawvela mipui sawrkar ram lian berte zinga chhiar tel turin Danpui kan nei a, he Danpui hian mi tinte chu zalênna, dikna leh intluk tlànna min pe a, nun nuam taka kan khawsak theihna tur te min ruahmansakin, thlamuang leh hahdam taka kan khawsak tlàn dial dial theihna tur kawngte pawh min kawh hmuh bawk a ni, a ti. Kan hriat theuh angin Siaha District hi Mizorama District sawm leh pakhat zingah District upa berte zinga mi a ni a; sawrkar kut-ke inbun hmasakna hmun a nih angin hmasawnna hrang hrang pawhin min thleng hmasa a ti a. Hriatna leh thiamna kawngah pawh rual pâwl tawk tak kan ni a tih theih a,  vantlang khawsak phung leh kan tuallai nunah pawh ngaihmawh tur thil thenkhat awm ve bawk mahse, hmangaihna leh induhsak tawnna kan neih thinte pawh kan la chhawm nung zel a, inthenawm khawvenna lamah pawh nun mawi leh duhawm takin kan nunah thu a la sawi reng a ni, a ti. Siaha District mipuite hi kan vannei hle a, sap ram atanga lo kal Missionary-te thutchilh kan ni a, Kohhran nung tak min dinsak a; an thâwk tawp thlengin chung Missionary-te chuan min awmpui a, an lei taksa chawlh hahdamna turah pawh he ram ngei hi an thlang a.  Missionary hnuhnung ber Rev. Violet Louise Anne Mark chuan November 13, 2023 mai khan min chawlhsan a,  Kan hriat rengnaah an sulhnute a châm reng tawh dawn a ti a. Republic Day vawi 75-na lawm  tura lo kal  mipui, sawrkar Official  leh Parade contingent zawng zawngte chungah lawmthu a sawi a ni.

Vawiin Republic Day vawi 75-na lawmna pual hian Parade contingent 15- uniform contingent-5 leh School contingent-10 an awm thei a. Parade Commander hi Inspector H. Lalramnghaka, Company Commander, 3rd IR Ballion, Siaha a ni. Parade Contingent- te hnenah hian Khuallian chuan lawmman hlanna a nei nghal a. Parade lawm man dawngtute chu a hnuaiah hian tarlan  a ni.

Uniform contingent 

Pakhat na - Mizoram Police

Pahnih na- NCC, Government High School, New Siaha

Pathum na- Mizoram Home Guard

School contingent 

Pakhatna- Hill Gate School 

Pahnih na- Blue Bells School

Pathum na- Gov.t High School, New Siaha 

Parade contingent zawng zawngte hnenah hian Consolation prize hlan ni bawkin  'National Anthem'  sa tu - Government Vaihpi High School, hnenah khuallian chuan lawmman hlan bawkin  Siaha District atanga Governor' Gold Medal dawngtu awm chhun ASI Lalhmunsanga, DEF hnenah Governor aiawhin  khuallian chuan Medal a hlan bawk.

Vawiin Republic Day lawmna pual  hian a vawikhatna atan 20th  Battalion, Assam Riffles-ten an silai leh hmanrua neih that tak takte mipui entheih turin an pholang a. Mipuiten heihi an hlut hle a ni.

Republic Day 2024 pual hian  Volley Ball Tournament buatsaih a ni bawk a, Lawmman dawngtute chu 

Vollyball

Women Category- 

Champion Model United Volleyball Club  Runner up- Siahatla Volleyball Club

Men  Category- 

Champion- Meisatla Volleyball Club 

Runner up- Southern Spiker Volleyball Club- te an ni.

Vantlang huapa Republic Day lawmna pui ber District Playground, Vaihpi a neih zawhfel a nih hnu hian  kum danga tih thin angin' VIPs At Home'  program-chu Circuit House, New Siahaah neih nghal a ni a, he program- hi Deputy Commissioner, Siaha chuan a thleng a ni.

Khuallian thusawi hi a hnuaia link ah hian entheih a ni e.

Siaha Republic Day 2024 - Chief Guest Speech.pdf