No.729/2021-2022

Lawngtlai, Tomir thla ni 29, 2021: Vawiin khan Lawngtlai East Bialtu MLA & Agriculture Development Board Vice Chairman Pu H. Biakzaua chuan Lawngtlai khawpui chhunga a bial chin veng pariat (8)-a COVID-19 hri leng mek boruaka chhungkaw khawsak harsate chhawmdawl nan leh hri leng dona kawnga tha thawhtu he'ng veng pariata Village Level Task Force (VLTF) leh Central Young Lai Association (CYLA) te tha tihchak nan tanpuina thilpek a hlan.

Pu H. Biakzaua'n vawiina a bial chhung veng pariata VLTF a tlawhte chu: Electric Veng, Lawngtlai-III, Bazar Veng, New Vengpui, Lawngtlai Vengpui, Council Veng, Bethel Veng leh Chandmary te an ni a. He'ng veng pariata VLTF-te hnenah hian COVID-19 hri leng vanga inkharkhip mek laia an veng chhunga chhungkaw khawsak harsate chhawmdawl nan Rs 40,000/- (cheng sing li) theuh a hlan a. VLTF-te hian an veng chhunga chhungkaw khawsak harsa zualte lo thlang chhuakin, chhawmdawlna hi an lo sem chhawng dawn a ni.

Pu H. Biakzaua chuan he'ng veng pariata VLTF-te intuamhlawm nan hian Rs 5,000/- (cheng sang nga) theuh hlan bawkin, hri leng dona kawnga an chet chhuahnaa hri laka an him theih nana invenhimna pawimawh tak, hmai tuamna (face mask) leh kut bualhlo (hand sanitiser) a hlan tel theuh bawk a. Hei bakah hian, Lawngtlai District-a hri leng dona kawnga nasa taka tha thawhtu Central YLA te'n tul leh pawimawha an hman atan Rs 20,000/- (cheng sing hnih) a hlan bawk.

Vawiina Pu H. Biakzaua'n tanpuina pawisa fai a sem chhuah hi a zavaiin Rs 3,80,000/- (cheng nuai thum leh sing riat) a ni a. Thla hmasa, April thla khan Lawngtlai khawpui chhung VLTF-te hnenah Rs 10,000/- (cheng sing khat) theuh a lo pe tawh bawk a ni.

Pu H. Biakzaua chuan hri leng dona kawngah Lawngtlai District-a DLTF leh VLTF te hma lakna chu chhuanawm a tih thu sawiin, lawm thu a sawi a. Hri leng laka him nana sawrkar thu chhuahte zawm a, tawiawm tlat turin Lawngtlai District mipuite a chah thar bawk. 

Lawngtlai East Bialtu MLA & Agriculture Development Board Vice Chairman Pu H. Biakzaua hi  Lai Autonomous District Council (LADC)-a Chief Executive Member (CEM) Pu Manghmung Chinzah leh a thawhpui EM leh MDC thenkhat leh MNF Party hruaitute'n an tawiawm a ni.

Attachment

  • Loading attachment...