No.4219/2020-2021 

Lawngtlai, Thlazing ni 19, 2020: Mizoram Upa Pawl (MUP), District Headquarters Lawngtlai Recreation Centre chu vawiin khan Lawngtlai East bialtu MLA, Agriculture Development Board Vice Chairman Pu H. Biakzaua'n a hawng.

Pu H. Biakzaua chuan hnam fing leh ram changkang apiangin upate an zahin an ngaihlu a, an nun hlimna tur an ngaihtuahsak thin tih sawiin, Lawngtlai District MUP te'n upate inkawm khawmna leh intihhlimna hmun tur recreation centre tha tak an nei thei chu lawmawm a tih thu a sawi a, upate tana chhenfakawm zawk a nih theih nan a chhung bungrua tihchangtlunna tur pawh ngaihtuah belh zel a tul, a ti a. MUP chu kum 50 tling chin insuih khawm pawl niin, a member-te pawh finna leh remhriatna kawnga thluak fim rual, ram, khawtlang, hnam leh sakhuanaah pawh rawngbawlna pawimawh fawng vuantute an nih avangin pawl pawimawh tak a ni a, ram tana pawl chhenfakawm tak an ni thei tih sawiin, District MUP member-te chu kut kuangkuaha thuthluang mai lo va, ram hmasawn nana theih tawp chhuah turin a chah.

Lawngtlai DC Complex-a MUP Recreation Centre hawnna inkhawm hi District Headquarters MUP President Pu H. Liantluanga'n a kaihruai a. BCM Lawngtlai East bialtu Pastor Rev. Laltanpuia Colney chuan hunserh a hmang a. District Headquarters MUP Secretary Pu H. Sangmuana'n report pein, lawm thu a sawi bawk.

MUP Lawngtlai hi ni 10.12.1988-ah din niin, tunah chuan District Headquarters-ah hlan kai a ni tawh a, a hnuaiah hian Branch 50 vel a awm mek a ni. Lawngtlaia MUP Recreation Centre hi RSVY sum atangin kum 2007-ah sak tan a ni a, sak zawh nghal theih a nih loh avangin a hnuah MLA Fund leh MP Fund awm thei ang ang hmanga sak chhunzawm niin, kum 2018 khan sak zawh a ni a, vawiin khan hawn a ni ta a ni.