No.4218/2020-2021 

Vawiin chawhma khan Parish Hall, Venglai Kolasibah Village Council inthlanna a Kolasib district chhung a Presiding Officer leh Polling Officer-1 te tan training buatsaih a ni a. Dr H. Lalthlangliana, District Election Officer chuan training hawnna hun hi hmanpuiin Sector Magistrate te an tel bawk a ni.

Training hawnnaah hian Dr H Lalthlangliana chuan, Covid-19 hrileng kar a inthlanna buatsaih a nih dawn avangin Inthlanna dan bu a inziak lo thil tam tak zawm a tul dawn thu a sawi a. Vote thlakturte chu inkar hlat a rem a tul dawn thu te , Kut silna leh Hand sanitizer chhawp vek a ngaih dawn bak ah hmanrua leh lehkha thlengin inkhawih tawm awm lo tur a kalpui tum a nih thu a sawi bawk a ni. Inthlanna a an chanvote chu phurrit a ngai lo turin District Election Officer chuan kalkhawmte a chah a,” Sawrkarin khawtlang hruaitu thlanchhuah kawng a mawhphurhna pawimawh tak la turin a ringtawk che u a, phur takin mahni chanvo theuh hlenchhuak turin ka chah duh che u a ni,” a ti. “Inthlanna chu a Fair tur a ni a, a lang Fair bawk tur a ni”, a ti a, inthlanna kalpui kawngah felfai leh langtlang taka an hna theuhte ti thin turin Presiding Officer leh Polling Officer-I te chu a chah bawk a ni.

Vawiin training ah hian Pu Gaston Vanlalhriatpuia, DUDO, Kolasib leh Pu Neng Thianlala, BDO, Bilkhawthlir ten Ballot paper chungchang leh inthlanna kaihhnawih hraittur pawimawh hrang hrang inhrilh hriatna hun an hmang a. Pu Vanlalchhuanawma Chawngthu, Election Officer-in hun kaihruaiin, Pu Lallawmawma, Addl. DC in thusawina hun a hmang bawk a. Sector Magistrate 11, Presiding Officer-I 92 leh Polling Officer 92 te training-ah hian an tel a ni.

Kolasib district-ah hian Voter 60,634 awmin mipa 29,435 leh hmeichhia 31,199 an awm a, Village Council 56 a awm a ni. Hortokiah vote nei tam berin voter 2777 an awm a, Saihapui V ah voter 171 awmin in 16 a awm a, vote tlemna ber a ni.