No.4217/2020-2021

Aizawl, the 19th August 2020 : Vawiin khan I & PR Director Pi Lallianpuii chuan a office ah Mizoram School of Photography leh Photography Club of Mizoram ten World Photography Day vawi 181-na denchhena an buatsaih Thlalak Phochhuahna leh Inelna ‘Digital Photo Art Exhibition & Competition’ vawi 4-na chu online in a hawng a. Online-a Exhibition hawnna hi Pi K Vanlalsangi, Deputy Director, Pu Pratap Chhetri, IPRO leh MSP dintu Pu Malsawmtluanga ten an thlir a ni.

Exhibition hawngin Pi Lallianpuii chuan art hi mihring nuna bet hringnun tihlimtu a ni tiin chumi zinga photography chu thil hlu tak hmanlai thil awm dan leh chanchin te hmuh theiha vawngtu a ni a, chuvangin art a nih mai bakah documentation hmanraw pawimawh tak a ni, a ti. Thlalak in mihring nun a khawih dan sawiin thlalak pakhat in thumal 1000 a tluk tia an lo sawi fo thin tawh chu a dik hle a, art anih bakah photography hi eizawnna tha tak a ni, a ti a. Mizoram School of Photography chu thahnemngai taka photography lama hma la zel tura chahin Mizo thalai te talent chher hriamtu leh tipungtu ni turin MSP chu duhsakna a hlan a ni.

Pu Malsawmtluanga, MSP dintu in report tawite sawiin inelna an neih chhoh dan te a sawi a ni.

Photo Exhibition hi kum dangah chuan hmun hrang hrangah neih thin a ni a. Kuminah erawh Covid-19 avangin Website hmanga phochhuah a ni ve thung.

Mizoram School of Photography a din atang hian kumtin World Photography Day hi hman thin a ni a. MSP atanga zirchhuakte leh Photography Club of Mizoram member te tan buatsaih thin a ni.

MSP hi Mizoten Photography-a hma kan sawn zel theihna tura din a ni a. Photography Art awmzia inzirtir te, kan ram mawina leh hnamzia pho lan te, nungcha leh ramngaw humhalh leh a pawimawhna midangte zirtir a, Mizo thalai ten eizawnna tlaka an hman theih nana chherchhuah hi a tum bulpui pakhat a ni.

Mizoram School of Photography hi National Academy of Photography, Kolkata in a Recognized a, MSP enkawlna hnuaia din Photography Club of Mizoram (PCOM) hi Federation of Indian Photography (FIP) hnuaiah Affiliated Club a ni mek bawk.

WPD 2020 Digital Photo Art Exhibition & Competition hi National & International Salon an neihdan zul zuia buatsaih a ni a. Thlalak 244 lutin mi 37 an tel a ni. Section 5 ah then a ni a. Chungte chu - (i) Open Colour (ii) Open Monochrome (iii) Nature (iv) Life (v) Masterpiece(Inelna category a tel lo)

www.pcom.ga ah hian thlalak te hi en theiha phochhuah vek a ni a, Result pawh hmuhtheihin a awm nghal bawk.

24th-28th November, 2020 hian 3rd MSP Photographic Salon chu a duh apiang tel theihna turin buatsaih leh an tum a, thlalak lama tui mi tawh phawt chu lo tel vek turin kan sawm nghal e.