Pu H.Lalhmingthanga I&PRO, Saiha chuan nimin khan a Office Chamber-ah Chanchinbu mite a kawm. Pu H.Lalhmingthanga chuan IPRO charge a lak chhunga Chanchinbu mite nen thawhhona tha tak an neih avangin lawmthu a sawi a, district danga chanchinbu mite elpha tura theihtawp chhuaha tan la sauh sauh turin kalkhawmte chu a chah ani.

Chanchinbu chhuah chungchangah Regularity ngai pawimawh tur leh han en mai pawh a chhiar chakawm a chanchinbu te felfai tak a chhuah thin turin a chah a. Circulation chungchang sawiin mipuite huapzau thei ang bera an chanchinbute chhuah tur leh a copy te pawh tam thei ang bera siam turin a ngen bawk. Sawrkar thiltih thatte a tam thei ang bera puanzar thin a pawimawh thu sawiin sawrkar thuchhuah reng reng pawh chhuah chhawng zel turin a ngen bawk a ni. Chanchinbu mite tan hriattur pawimawh hrang hrang leh an tih tur leh tihloh tur te pawh sawilangin chanchinbu hlutzawng tehna pawimawh ber pakhat chu Editorial Column hi ani a, editorial a an thuziakte chu belhchian dawl leh a hun lai a zira mipuite tan chhawr nahawm leh zirtir nei ni thei thin se a pawimawh a tih thu a sawi bawk ani. Editorte chu eng Political Party ah pawh tel se, an tan zawng te chanchinbu-ah langsar lutuk a tilang thin lo turin a chah bawk ani. I&PR  department leh chanchinbu mite chu thawktlang kan nih thu sawiin khawtlangnun siamthat kawngah ziakmite a pawimawh hle ani, a ti bawk.

He Press  Meet ah hian Saiha leh Tuipang atangin Chanchinbu mi leh Cable T.V. neitu mi 15 lai an tel a. Tlai lamah Chanchinbu mite puala ruai a buatsaih chu Press mite leh I&PRO Staff ten an kilho nghal a ni.