Pu H. Lalzirliana, 3-Mamit Bialtu MLA, chuan vawiin atang khan a bialchhung khaw hrang hrang a tlawhkual mek.

Bialtu MLA hian vawiin khan Tuirum, Teirei Forest leh Khawhnai khuate a tlawhin khawtlang hruaitu leh mipui te'n an lo lawm a ni.

Bialtu MLA chuan Mizoram Sawrkar chuan inkalpawhna kawngpui tha siam chu a ngaih pawimawh ber a nih dawn thusawiin, tunah pawh inkalpawhna kawngpui tam tak siamchhoh mek zel a ni a ti. Kan  Sawrkar chuan tun atanga reilote-ah SEDP a kalpui dawn a, mi harsa zawkte tan pawh inkhaichhuahna tur leh mi zawng zawng len vekna tur a nih dawn thu a sawi a, Mizoram Sawrkar chak tak hmalaknain Aizawl khawpui laili taka awm Assam Rifle Centre chu sawnchhuah thuai tum a nih thu a sawi bawk.

Mamit District Hospital chu khum 100 awm theihna turin DPR 83 crore Approved mai tura peihfel a nih tawh thu sawiin hun reilote ah a chhuah thuai rin a ni a ti. Mamit District-ah HSS Science zirna awmlo chu session thar a tang chuan Science Stream zirna hawn a nih dawn thu sawiin, Teacher la tura ruahmanna siam mek a nih thu a sawi, Tribal Girls Hostel sakna turin DPR thehluh a nih tawh thu a sawi bawk. Govt Khawhnai School Building thawmthat ngai chu repair a nih dawn thu a sawi bawk a ni.

Pu H. Lalzirliana, Bialtu MLA chuan bial mipuite chu Mizoram Sawrkar hnuaiah thlamuang taka awm tur leh rinna ngat tlat turin a chah bawk a ni.

Pu H. Lalzirliana, Bialtu MLA hi Mamit District chhunga Sawrkar Department aiawhte te'n an tawiawm a. Naktuk hian bialchhung khua a tlawh chhunzawm leh ang.