Vawiin khan Agriculture Conference Hall-ah Thlai Chi sawngbawl dan tur zirna (Seed treatment Drive) hun hman a ni. He hunah hian Khuallian Pu H. Liansailova, Hon`ble Agriculture Minister chuan thu sawiin, Buh leh bal hlawk zawk leh hrisel zawk a loneitu ten an thar theihna tura Agriculture Department hotuten hma an la hi a lawmawm a; District Agriculture Officer tin ten mahni biala a hlawhtlinna tura theih tawpa bawhzui turin a chah nghal a. Minister chuan nikum lamah pawh nasa taka tan an lak avangin buh thar nasa takin a pung a, kuminah pawh mi thiamten lo neitute hmangaihna nen tan la nasa leh zual turin leh Department-a hnathawktute leh loneituten nasa zawka tan la lehzual turin a chah a ni.

He inkhawm hi Director Dr C. Lalzarlianan kaihruai in, Secretary Pu T.V Fambawl pawhin thu sawiin, Mizoramin ei leh bara kan intodelhna turin Officer leh Field Staff zawng zawngten thahnemngai lehzuala an thawh chuan a hlawhtling zual dawn a ni tih a sawi. Seed Treatment hi Buh leh thlai chi theh, tuh hmaa leia natna hrik awm leh, thlai chia natna hrik awm laka venna damdawi (Fungicide) nena nuai pawlh a ni a, a awlsamin a man a tlawm a; Ministry of Agriculture, Govt of India pawhin a ngai pawimawh em em a, State tina Agriculture Department te chu uluk tak leh tha taka lo neitute zirtir ngei turin thupek leh hriattirna a chhuah nghe nghe a ni, ati. Kumin 2012-a leilet buh chin turte chu damdawi (Fungicide) nena uluk taka nuaipawlh vek tura hmalak an tum bawk a ni.

He damdawi sawngbawl dan hi Pu C. Lalnithanga, Asst .Plant Protection Officer-in a takin a entir a, damdawi hman tawk tur te an inzirtir a ni.

Agriculture mi thiamte hmalakna hi loneitute pawhin taima taka hmang theuh tura lo inbuatsaih a tul dawn a ni. Mizoramin buh leh bal kan thar chhuah tihpun a, intodelh tura hmalak hi kut hnathawktute mawhphurhna a ni thui hle bawk a ni.