Sawrkar Laipuiin hmasawnna atana ruahmanna hrang hrang a kalpui mek Bharat Nirman tih a hriat lar, tarlanna leh phochhuahna Photo Exhibition chu vawiin khan Mizoram Larsap Pu Vakkom Purushothaman’n Aijal Club a hawng, hawnna programme ah hian I & PR Minister Pu Zodintluanga chu khualzahawm a ni.

Photo Exhibition hi Ministry of Information & Broadcasting hnuaia awm Directorate of Advertising & Visual Publicity in an buatsaih a. April ni 23 atangin May ni 2 thleng a awh anga, a duh apiang tan nitin zing dar 10:00 atangin tlai dar 4:00 thleng a chhim theih ang.

Photo Exhibition-ah hian MGNREGS, NHRM, RMSA, RTE, ICDS, PMGSY, RGGVJ, JNNURM, IAY, National Food Security Mission leh Sorkar Laipui ruahmanna hrang hrang dangte thlalak leh thuziak hmanga tarlan a ni. Exhibition hawnaah hian BSF DIG Shri A Srinivas, PIB Aizawl hotu Pu Mangjagam Touthang, DAVP Field Publicity Officer Shri Durganath Swarnkar leh mi pawimawh dangte an tel a ni.

Nikum lamah khan hetianga Sorkar Laipui Flagship programme inhrilhriatna hun leh exhibition chu Mizoram khaw thenkhatah buatsaih a lo ni tawh a ni.