Administrative Training Institute (ATI) in Sawrkar senior officer-te tan training an buatsaih mek chu Pu H. Liansailova, Minister, Agriculture, DP & AR, etc chuan vawiin khan a kharna programme ATI Auditorium-ah a hmanpui. He programme hi ATI Director Pu R Vanlalvena IAS chuan a kaihruai a ni.

Pu H. Liansailova chuan senior officer-te chu Secretariat lam leh Directorate lam te tun aia tha zawk leh inpawh zawka thawk ho thei turin an ngaihtuahna seng a, a siamthat ngaite chu neitu chan changa siamtha turin a chah a.  Minister chuan Ministry chu a kal chhuak a, a dangin a lo thlak a, sawrkar neitu tak tak te chu Sawrkar hnathawkte an ni  tiin  officer te chu ram leh hnam hmasawn nan  theitawp chhuah thin turin a fuih a ni. Minister chuan officer te chu an service chhunga thil tha, chhinchhiahtlak, mipui in an tangkaipui theih tur sulhnu an neih theih chuan an hnathawh thatna tehfung tha tak a nih theih thu a sawi.

Pu H. Liansailova chuan sum leh pai  harsat thu sawiin resource tih san nan paying capacity nei te, a bikin sawrkar officer te chuan market rate tal a buhfai an lei a tul thu a sawi.  Minister chuan Officer kalkhawm te chu sum leh pai dik tak leh tha tak a hman a nih chuan  hmasawnna a thlen ngei a beisei thu sawiin officer te an hriatna leh thiamna hmanga Sawrkar finchhuah pui turin a chah bawk a ni.  

He hunah hian training lam te atangin Feedback sawi a ni a, Pu Zorammawia, Director Fire and Emergency Services leh Pu Lalthangliana Varte Commissioner, Taxation ten training leh huna belhchalh leh subject matter telh thar awm te an tarlang bawk a ni. Training programme hi Secretary te, Addl. Secretaryte leh Director te bakah senior officer thahnem takin a zo a ni.