Vawiin khan Planning & Programme Implementation Minister  Pu H.Liansailova chuan Mizoram Science Centre Berawtlang-ah 3D Cinema leh Documentary te en theihna 3D Theatre a hawng.

Pu H Liansailova chuan hawnna inkhawm a thusawiin Mizoram Sorkar hnuaia Science & Technology lamah thawktute hmalakna leh remhriatna avanga Hmarchak a 3D Theatre nei State dawttu kan ni chu lawmawm tiin naupang leh zirlai tan thil tangkai tak a nih ngei a beisei thu a sawi. Pu H.Liansailova chuan Science leh Technology thiamna chu ram hmasawnna hnuk pawimawh a ni tiin Ram hmasawnna leh Sumpai dinhmun chawikan nan  Science leh Technology  behchhan ah ruahmanna siam a pawimawh thu a sawi.

He hunah zirlai kalkhawm te fuihin  Pu H.Liansailova chuan thiamna sang zawk nena loneih, ranvulh leh thlai chin thalai lehkha thiam rual ten ngaihvenna chang an hriat leh a taka an thawh ngei chuan ram dinhmun siamthat piah lamah Sorkar hna a innghat mai lovin  mahni a eizawnna nghet an nei thei a ni a ti.

3D Theatre hawn nan hian Sorkar Laipui ah National Science Council of Science Museum (NSCM) chuan hmanrua(Equipment) zawng zawng cheng nuai 12.5 man hu zet a tlawnin a rawn pe a.  Cheng nuai 4 sengin State Sorkar chuan mi 40 lenna tur 3D Theatre leh a thutna an buatsaih bawk a ni. 3D Theatre Show en man chu zirlai tan cheng 10 leh midang tan cheng 20 niin ni khatah vawi thum show ruahman tum a ni.
3D Cinema hi a bika siam tarmit hmanga en tur a ni a, tunlai Cinema khawvel a technology sang ber a ni.  

Kum 2003 a din Mizoram Science Centre hian Mizoram a Science tihlar leh thehlar kawngah nasa takin an thawk mek a ni. A din tirh atangin mi 154032 in an tlawh tawh a; hemi zingah 66968 chu zirlai an ni.