Education Minister Pu H. Rohluna chuan vawiin chawhma dar 11:30 khan Aijal Club-ah Higher Secondary School Lectureres Association of Mizoram (HISSLAM) in 16th Annual General Conference chu Khuallian niin a hmanpui.

Zirtirna tha leh changkang Quality Education nei tura sorkar in hma a lo lak tawh dan leh a kalpui zel dan sawiin Khuallian Pu H. Rohluna chuan Education hmasawnna atana ruahmanna tam tak bawhzui tur a awm laia sum lam indaih lohna avanga harsatna an tawh dan leh hmasawnna a chak theih loh thu a sawi a. Education Minister a nihna ah a kovah mawhphurhna lian hle mahse Education Department a Senior Officer leh Welfare hrang hrang a hotuten an tawiawm that na leh an felna ah lawmthu sawiin duhthusam anga kalpui theih loh a nih na ah erawh chuan hriatthiamna a ngen a ni.

Transfer & Posting chungchang ah te mitin duh dan anga tihsak theih a ni lo tih sawiin Education Minister chuan hmun tha leh kilkhawr ah awm a ngai a, Pathian rawngbawlna ah leh mawhphurhna ah ngaiin rinawm taka thawk in, a tha zawnga naupang zirtir tumna rilru nei turin kalkhawmte chu a ngen a in an awmna hmun apiang chu Lalpa dahna ah ngai tur leh ram leh hnam tana mi chhenfakawm chher chhuak ngei turin a chah in zirna piah lam a awmdan/nundan tha zirtir turin a sawm a ni.

Faina lamah tan lak a tulzia sawiin khuallian chuan Clean Mizoram Movement naktuk ni 14.11.2014 Jawaharlal Nehru Birthday a hman a nih thu sawiin faina chungchang zirlai naupangte rilru ah tuh thiam tur leh mahni In leh a vel te, School Building hrang hrang leh Compound te tihfaina kawnga tan la turin a ngen.

HISSLAM General Conference ah hian Khual Zahawm Pu R. Vanlalvena, Secretary, School Education Department pawhin thu sawiin Education Department chu Department dang ang a ni lova. Mihring management a nih avangin rilru thianghlim tak neih a ngai a ni tiin mi dang mawhpuh leh dem lam te, nawrh leh lungawi loh lan tir lam aia mawhphurhna tha taka hlen turin a ngen a, Conduct Rules hi bu pan te a nih avangin chhiar a hre chiang turin kalkhawm te a chah rualin ACR ziah dan ah tun aia uluk leh thiam zawk turin a ngen bawk a ni.

HISSLAM General Conference ah hian Principal Pension a kal chhuak mi 3 : 1) V.L. Hruaia Sailo, Govt. G.M. Higher Secondary School ; 2) C. Thanga, Chaltlang Govt. Higher Secondary School ; 3) R. Lalbiakthuama, J.L. Higher Secondary School, Aizawl te hnenah ngaihhruina thu ziak leh thilpek an hlan a ni.

Chawhnu lamah agenda hrang hrang sawi hovin nileng in hun hman a ni. Vawiin inkhawm ah hian Aizawl khawpui chhung leh Mizoram hmun hrang hrang atangin Annual Conference hmang tur hian Higher Secondary School Lecturer te an kal tha hle.