Vawiin khan Parliamentary Secretary for Higher and Technical Education, Pu H. Zothangliana chuan Lawngtlai dai, Thingkah khuaa Polytechnic zirna sikul sak mek leh Greater Lawngtlai Water Supply Scheme hnathawh mekte a hmunah kalin a en.

Pu. H. Zothangliana hian chawhma lamah Thingkah khuaa Ministry of Human Resources sum hmanga sak mek Polytechnic school a tlawh a, Thingkah khawtlang mipuite chu hnathawktute lo tawiawm tha tur leh zangnadawmna leh therhlo engemaw mai mai avanga hnathawh kawnga harsatna lo siam lo turin a ngen, hetiang zirna in pawimawh nakin lawka kan tu kan fate hma khua tiengtu tur kan nei tur hi phur taka lo dawn sawn a tul hle a ni a ti.

He school sak mek hi Lawngtlai PWD Building Division hnuaiah Contractor paruk ten hna then hrang hrang te chu a rualin an thawk hlawm a, sum sen tura ruahman hi Cheng vaibelchhe riat (8 Crore) niin zawh hun tura hun tiam thleng tawh mahse a panna kawngah harsatna a awm deuh avangin thla 8 dang dil belh leh mek a ni. Tunah hian hnathawh tur zawng zawng za zel sawmruk aia tam thawh zawh tawh a ni a, a panna kawng a tlang that chuan reiloteah zawh hman beisei a ni.

Pu. H. Zothangliana hian chawhnu lamah Greater Lawngtlai Water Supply Scheme thawh mek a tlawh bawk a, Chhimtuipui tui khawl tha chakna hmanga pump chhoh tur Project niin 26.645 Crore senna tura ruahman ni. A pump na khawl pui hi lui atanga meter 750 a sang Chengpawng zawlah bun tawh niin, Power Station pawh sak zawh tawh; power pek luh mai theih a ni. Chengpawng zawl atanga tui dahkhawlna tur hmun Chawnhu tlang hi Meter 5928 a sangah a awm thunga, tui dahkhawlna pawh hi thawh zawh tawh a ni. He Project hi kum 2040 ah pawh Lawngtlai khawpui chawm zo thei tura beisei a ni.

Pu Zothangliana chuan hna thawktute chu a hun taka hawn hman a beisei tlat a ni tih a hrilh a, Lawngtlai mipui te nghahfak Project a nih avangin mipuite pawhin thawktute chungah beiseina sang tak an nei a ni a ti.

Hnathawktu Company hi Exelsior Merchant Ltd. Kolkata lam an ni a, an ni hian chawl lovin hna an thawk reng niin Parliamentary Secretary hi an lo hrilh a, kumin March thlaah tui pump chhoh chhin hman an beisei thu an sawi lang bawk.

Pu Zothangliana hi Lawngtlai SP, Pu Lalringdika, MPS leh PWD leh PHE a Officer te bakah LADC EM leh mi pawimawh ten an tawiawm a ni.