Vawiin khan Lawngtlai College-ah kum 2014-15 chhunga Prime Minister Employment Generation Programme tanpuina Loan Lawngtlai leh Saiha District atanga hmute tana training buatsaih Entreprenuership Development Programme (EDP) chu Parliamentary Secretary for Higher and Technical Education Pu H. Zothangliana chuan a hawng.

Pu H. Zothangliana chuan Sawrkar laipui Flagship Programme zinga pawimawh tak mai PMEGP hian a tum ber chu thalai, theihna nei bul tanna sum nei silo te khai chhuaha ram hmasawnna atana tha thawhtu pawimawh tak ni tura chher chhuah a ni a, Loan zangkhai semna Policy a nilo tih hi kan hriat a tul a ni a ti. He Programme awm chhan hai derin mi tam takten an dila an hmu a an theihnghilh zui mai thin, chu chuan kan ram hmel a ti bala, kan District min ti hmingchhia a, kan hnunga lo kal ve mek kan naute zel tan kawng kan tiping ta thin a ni. Hei vang hian vawiina training te hi chuan kan hmuh chhan leh min tumpui ang dinhmun thlen ngei kan tum tur a ni a, PMEGP Loan la mi hlawhtlingte zingah tel kan tum ngei tur a ni a ti. Loan diltu tam takte zinga a vannei zualte in ni a, in hun tha hi kan ram hmel tibalh nan hmang lo hram turin ka ngen a che u tiin PMEGP 2014-15 tanpuina Loan hmu tura thlan kalkhawmte chu a ngen a ni.

Prime Minister Employment Generation Programme hnuaiah hian Lawngtlai leh Saiha District atangin mi 85 tanpuina dawng tura thlan an ni a, heng thlan chhuahte hian Sponsoring Bank pathum Mizoram Rural bank, Mizoram Cooperative Apex Bank leh State Bank of India atangin PMEGP Loan hi an la anga, an trade thlan theuhah an pei pung dawn a, bul an tan tak tak hmain hetianga training hi buatsaih sak thin an ni.

Vawiina Entreprenuer Development Programme buatsaih hawnna inkhawm hi Pu J.H Lalbiakliana, District Village Industries Officer, Lunglei chuan a kaihruai a, zirtirna pe tura hmun hrang hrang atanga thlankhawm mithiam ten zirtirna an pe nghal a, tun thla ni 13 thleng khian an training dawn a ni.