Sub-Headquarters MHIP, Serchhip chuan Hmeichhia te dinhmun chawikanna kawnga pawimawh tak pakhat hmeichhia ten inneih, inthen leh ro insem chungchanga an dikna leh zahawmna an humhim theihna tur Dan thar ‘The Mizo Marriage, Divorce and Inheritance of Property Act, 2014’ hman a lo nih tak avanga lawmthu sawi nan Mizoram Sawrkar thuneitu lu ber Pu Lal Thanhawla, Chief Minister chawimawina hun vawiin nileng khan New Serchhip YMA Hall-ah an hmang a, Law Minister Pu Lalsawta pawh Khualzahawm ah tangin chawimawina hlan tel a ni.

Cheif Minister chuan mimal chawimawina chu dawng thei leh dawng turin a tling tawk lova, Law Minister, Law Commission Chairman leh MLA zawng zawngin lungrual taka an passed anih avangin an zavaia an thawhhona rah a ni a ti a, MHIP hruaitu hmasa leh hruaitu ni mek ten theihtawp chhuaha hma an lakna rah a ni tel bawk a ni, a ti bawk. Sub-Headquarters MHIP, Serchhip ten an zahawmna leh dikna vawnhimna tura Dan thar lo piang lawm nachang an hria chu ropui a tih thu sawiin Dan reng reng hi a thalo zawnga hman tum talh tan chuan hman theih vek a ni a, chuvang chuan midangte tana harsatna thlen na atana hmang lo turin leh rilru fim tak pu chunga Dan in a humhalhna te hmang thin turin a chah a ni. Chief Minister chuan duhsakna thilpek hrang hrang a dawn avanga lawmthu sawiin an thil dawn tam ber chu sawichhiat leh elrelna a ni a ti a, heng sawichhiatna leh elrelna te phur zo tur leh tuar chhuak thei tura Pathian an belh thu leh Pathian-in hriselna leh chakna a pek thu a sawi bawk.

Chief Minister chuan rambuai lai chanchin sawiin mipui ten harsatna namenlo an tawk a, tam a tla a, in leh lo tam tak kan chan bawk a, hengte hi hre rengin remna leh muanna a awm hnu a Sawrkarna an siam leh veleh rambuai in a nghawng mipuiten lei rem an rah theihnan NLUP an kalpui nghal a, chhungkaw tam takin dinchhuah nan an hmang bawk a ni a ti a, NLUP hian Sawrkar hnathawk leh sumdawng mihausate a zawng lova, miretheite a zawng zawk a ni tiin, kum 10 zet Sawrkarna an chelh loh hnu, kum 2008 a Sawrkar thar siam anih khan NLUP changtlung zawk ruahman leh niin sawichhiatna leh dodalna tam tak awm mahse Pathian-in a hriatpui programme anih vangin a hlawhchham dawnlo a ni a ti bawk. Hnam zahawm ni tur chuan ei leh bar, sum leh pai a intodelh a ngai a, hemi tur hian NLUP kaltlangin theihtawp chhuah a pawimawh a ni a ti bawk.

Dan passed tak hman theihna tur, a rules pawh beisei aia hmaa peihfel a ni chu a lawmawm hle a ni Pu Hawla chuan a ti a. Kan zavaia lawm tlanna leh kan hamthat tlanna tur a ni a ti a. Hmeichhiate hi chhungkua ah leh khawtlang leh kohhran thlengin an pawimawh a ni a ti a. Sorkar programme pawimawh ber NLUP hlawhtlinna ah pawh thui tak hmeichhia ten mawh an phur a ni tiin, kan sum lakluh mila khawsak thiamah te nu te hi in pawimawh hle a ni, a ti.

Khualzahawm Pu Lalsawta, Law Minister pawhin ‘The Mizo Marriage, Divorce and Inheritance of Property Act, 2014’ chu hmeichhiate chanvo humhalhna leh zahawmna humhimna tura rahbi thar pawimawh tak anih avangin hmeichhiate pawhin uluk takin belchiang se a duh thu a sawi a, hmeichhiate hi Sawrkarin a ngaihlu a an dinhmun tih that zel a tum dawn a ni a ti bawk. Pu Sawta chuan Mizoram hmasawnna tur chuan damdawi kha kan ei a ngai tawh a, Sawrkar sum enkawlna tur leh mahni intodelh tura hma lak kawngah chak taka hma lak anih dawn thu leh hmathlir thui tak nei a ruahmanna felfai tak nen kal anih avangin Sawrkar chu a tawlh dawn lo a ni a ti a, hun lo kal turah eng party pawhin Sawrkarna siam se tuna an hmalakna hi an tana tha tur, lo inhmakhawsuihna a ni a ti a, politics a inchirhthehna atana hmang mai mai lova party tinte tanrual a, infinchhuah a tul zawk a ni a ti bawk.

‘The Mizo Marriage, Divorce and Inheritance of Property Act, 2014’ ah hian hmeichhiate chu an pasal ten an duh duh a an Mak (then) theihlohna tur leh ro insem chungchangah pawh chanvo an neih theihna tur Dan a awm bakah hmeichhiate zahawmna tur Dan pawimawh tak tak a awm a ni.

Chawimawina inkhawm hi MHIP Sub Hqrs. Serchhip President Pi Saimawii Sailo-in a kaihruai a. Chief Minister hi Pu Ronald Sapa Tlau, Member of Parliament, Rajya Sabha leh MHIP General Headquarters hruaitu hlui leh hruaitu nilai mek thahnem takin an tawiawm a, tlaiah ruai theh a ni bawk.